Քաղաքագետը համարժեք չի համարում միջազգային հանրության արձագանքը Քեսաբի դեպքերին

Քեսաբի ցավալի դեպքերին միջազգային հանրության արձագանքը համարժեք չէ: Մարտի 31-ին լրագրողների հետ հանդիպմանը նման կարծիք հայտնեց քաղաքագետ Սերգեյ Մինասյանը: «Նման դեպքերում միակ համարժեք պատասխանը պետք է լինի ռազմական միջամտությունը, այլ ոչ թե հայտարարություններով հանդես գալը»,- նշեց Մինասյանը:

Նրա կարծիքով՝ այն, որ ԱՄՆ-ն, Ռուսաստանը, միջազգային որոշ կառույցներ հայտարարություններով են հանդես եկել Քեսաբի դեպքերի վերաբերյալ, հայկական սփյուռքի ջանքերի շնորհիվ է: «Իհարկե, պետք է բարձր գնահատենք այն աշխատանքը, որ տանում է սփյուռքը աշխարհի տարբեր հատվածներում, սակայն ինձ համար ներկա պահին առավել կարևոր է, թե սիրիական բանակը երբ կկարողանա կրկին վերականգնել վերահսկողությունը Քեսաբի նկատմամբ, ինչը հնարավորություն կտա մեր հայրենաիցներին վերադառնալ իրենց տները»,- ասաց քաղաքագետը:

Մինասյանը կարծիք հայտնեց, որ այս դեպքում սիրիական բանակի համար շատ կարևոր է Ռուսաստանի ռազմական աջակցությունը՝ զինյալներին կարևոր նշանակության տարածքներից հետ մղելու համար: Նմանատիպ կարևոր նշանակություն ունեցող տարածք է նաև Քեսաբը, որը հետ բերելու համար սիրիական բանակն ամեն ինչ անելու է, իսկ Ռուսաստանի ռազմական աջակցությունը շատ լուրջ օգնություն կարող է լինել:

Անդրադառնալով Քեսաբի դեպքերի վերաբերյալ Հայաստանի արձագանքին՝ Մինասյանը հիշեցրեց, որ Հայաստանն այդ դեպքերին անդրադարձել է թե′ արտգործնախարարության, թե′ խորհրդարանական մակարդակով: Քաղաքագետը նշեց, որ այս պահին քեսաբահայերը Սիրիան լքելու և այլ երկիր տեղափոխվելու ցանկություն չունեն, իսկ Հայաստանը սիրիական իշխանությունների և միջազգային կառույցների օգնությամբ փորձում է հասնել նրան, որ քեսաբահայերն իրենց տները վերադառնալու հնարավորություն ստանան, սակայն եթե ռազմական գործողությունները ձգձգվեն` Հայաստանն արդեն ավելի ակտիվ քայլեր պետք է ձեռնարկի նրանց խնդիրներին լուծում տալու համար:

Թուրք-սիրիական սահմանի մերձակայքում և Լաթաքիայի հյուսիսում գտնվող Քեսաբ գյուղաքաղաքի վրա հարձակումն սկսվել է մարտի 21-ին Թուրքիայի սահմանի ութ կետերից: Տեղեկություններ են հաղորդվել, որ հարձակումն իրականացրել են «Ջաբհա ան Նուսրա» և «Ջեյշ ալ Իսլամ» խմբավորումները: Գյուղաքաղաքում բնակիչներ գրեթե չեն մնացել, նրանք տեղափոխվել են առավել ապահով վայրեր: Հայերի մեծամասնությունը ապաստան է գտել Լաթաքիայի Սուրբ Աստվածածին եկեղեցու տարածքի մոտ գտնվող ազգային կառույցներում: Տեղի Հայկական շտապօգնության մարմինը Սիրիայի Կարմիր մահիկ ի կազմակերպության հետ բնակիչներին ապահովել է անհրաժեշտ պարագաներով և սնունդով: