Բռնի ուժով թուրքական բանտ տեղափոխված 22 քեսաբահայերից երեքը կեսօրին կվերադառնան Լաթաքիա. ՍԴՀԿ

ԱՐԽԻՎ 31 Մարտ, 2014 17:43

Ձերբակալված և բռնի ուժով թուրքական բանտ տեղափոխված 22 քեսաբահայերից երեքը մարտի 31-ին կեսօրից հետո կտեղափոխվեն Լաթաքիա: Մարտի 31-ին հրավիրված ասուլիսում ՍԴՀԿ Հայաստանի կառույցի փոխատենապետ, սիրիահայ Վազգեն Մեսրոպյանը, ներկայացնելով Քեսաբում տեղի ունեցող վերջին իրադարձությունները, հայտնեց, որ բացի երեքից, մյուս քեսաբահայերի ճակատագիրը շարունակում է մնալ անհայտ: «Այդ երեքից մեկը, ով հանրածանոթ է քեսաբահայերին, ուսուցիչ էր, այժմ եկեղեցու պահակություն էր անում, նրան Ստալին պապիկ էին ասում, ով 94 տարեկան է: Մյուս երկուսը' տեր և տիկին Հակոբ- Ղազարյաններերի ընտանիքն է, ում անմիջապես Քեսաբից տարել են Թուրքիա»,- տեղեկացրեց Մեսրոպյանը' հավելելով, որ թուրքական բանտ տեղափոխվածների մեծ մասը 80-ն անց տարեցներ են:

Նա հայտնեց, որ շատ քեսաբահայեր իրենց տներում թողել են իրենց ողջ ունեցվածքը, անգամ բջջային հեռախոսները, որոնցից ահաբեկիչներն օգտվում են' տարատեսակ զանգեր կատարելով անգամ արտերկիր: «Ահաբեկիչները զանգահարում են և ասում. «մենք ձեր տներում ենք»: Նրանք մեքենաներով տեղափոխում են Թուրքիա և վաճառում քեսաբահայերի ունեցվածքը»,-պատմեց ՍԴՀԿ Հայաստանի կառույցի փոխատենապետը:

«Երբ թուրքական ուժերը ներխուժել են Քեսաբ երեք սահմանակետերից, բարեբախտաբար, մի խումբ հայ երիտասարդներ, ովքեր հսկում էին շրջանը, զգացել են նախապես և ընտանիքներին տեղափոխել Լաթաքիա. այդ երիտասարդներին շատ բան ենք պարտական»,- ասաց բանախոսը: Նա շնորհակալություն հայտնեց, որ հայկական մամուլը հետաքրքրված է Սիրայում տիրող իրավիճակով և վերջին օրերին նաև Քեսաբում ստեղծված իրավիճակով, սակայն նա հորդորեց չմոռանալ նաև Հալեպի մասին:

«Մենք չպետք է մոռանանք Հալեպը, որն այժմ հոսանքազրկված է»,-շեշտեց սիրիահայը: Նա հավաստիացրեց, որ սիրահայերը վստահ են իրենց հերոս բանակի վրա և հույս ունեն, որ իրենց կհաջողվի ազատագրել բոլոր բռնագրավված հողերը: «Սիրահայ համայնքը հզոր է և անպայման պետք է վերադարձնենք գաղութները, որոնք գտնվում են ահաբեկիչների ձեռքում»,- ընդգծեց Մեսրոպյանը' կատարված իրադարձությունները որակելով որպես ահաբեկչության վառ օրինակ:

Նա կոչ արեց միջազգային կառույցներին, դիտողի վիճակում չլինել, քանի որ միայն դատապարտումը բավական չէ, այլ ՀՀ արտաքին գործերի նախարարը պետք է միջազգային բոլոր կազմակերություններին իր բողոքի ձայնը հասցնի: Այժմ Քեսաբից տեղահանվածների մեծ մասն ունի բնակության վայրի խնդիր: