Արտեմ Ասատրյանը Կուտակային կենսաթոշակների օրենքում սահմանադրականության հետ կապված խնդիր չի տեսնում

ՀՀ աշխատանքի և սոցիալական հարցերի նախարար Արտեմ Ասատրյանը «Կուտակային կենսաթոշակների մասին» օրենքում սահմանադրական նորմերի հետ կապված խնդիրներ չի տեսնում: Միաժամանակ համակարգի ներդրումն ապահովող օրենքներում կան բովանդակային խնդիրներ, որոնց լուծում տալն ավելի ընդունելի կդարձնի այն հասարակության համար: Այդ մասին մարտի 31-ին ՍԴ-ում լրագրողների հետ ճեպազրույցում նշեց նախարարը: «Մեր կարծիքով, սահմանադրականության հետ կապված որևէ խնդիր չենք տեսնում»,- ասաց Ասատրյանը:

Նախարարի խոսքով՝ նոր համակարգի ներդրումն ապահովող օրենքների բովանդակության հետ կապված կան խնդիրներ, ինչպես բոլոր այլ օրենքներում: «Այդ խնդիրները քննարկելը և դրանց լուծում տալը միայն ավելի կկատարելագործի համակարգը և ավելի ընդունելի կդարձնի այն նաև մեր հասարակության համար»,- ասաց Ասատրյանը:

Անդրադառնալով հարցին՝ ինչո՞վ կտուժի համակարգը, եթե բարեփոխումների կիրառումը հետաձգվի մեկ-երկու տարով՝ Ասատրյանը նշեց, որ ներկայում, յուրաքանչյուր տարի շատ ավելի մեծ թվով անձինք են մուտք գործում կենսաթոշակային տարիք: «Այդ ցուցանիշներն առաջիկա 20-30 տարիներին գնալով խորացնելու են այդ դիսբալանսը աշխատաշուկա մուտք գործողների և կենսաթոշակի անցնողների»,- ասաց նախարարը՝ հավելելով, որ ուշացնելու դեպքում տվյալ սերունդն ավելի մեծ գին է վճարելու այդ անցման համար:

ՀՀ Սահմանադրական դատարանում մարտի 31-ին շարունակում է «Կուտակային կենսաթոշակների մասին» ՀՀ օրենքի 5, 7, 8, 37, 38, 45, 49 եւ 86-րդ հոդվածների սահմանադրականության վերաբերյալ» գործի դատաքննությունը: Այսօր որպես պատասխանող կողմ հանդես են գալիս ՀՀ կառավարության ու Կենտրոնական բանկի ներկայացուցիչները: Դիմող կողմի ներկայացուցիչներն են ՀՀ ԱԺ պատգամավ որ Արծվիկ Մինասյանը, փաստաբան Մերի Խաչատրյանը և իրավապաշտպան Արտակ Զեյնալյանը:

Դատաքննության առաջին փուլն անցկացվեց մարտի 28-ին, որտեղ պատասխանող կողմ էր ներգրավված ՀՀ Ազգային Ժողովը՝ ի դեմս ԱԺ պատգամավոր Հակոբ Հակոբյանի:

Հանրապետությունում հունվարի 1-ից գործարկվում է կենսաթոշակային պարտադիր կուտակային համակարգը, ըստ որի' 1974 թվականից հետո ծնված քաղաքացիները կկատարեն 5 տոկոսի չափով պարտադիր վճարումներ' կուտակային հիմնադրամներին: Կենսաթոշակային համակարգի մասնակիցների գումարները կառավարվելու է ֆոնդի կառավարիչների միջոցով: