Նոր որակի եղբայրական հարաբերություններ. ՀՀ ո՞ր իշխանավորն իր քեռուն կնետի շների երախ` հոշոտելու

ՀՀ կրթության և գիտության նախարար Արմեն Աշոտյանն այսօր ընդունել է Կուբայի գիտությունների ակադեմիայի փոխնախագահ, գիտության հարցերով պետական խորհրդական Ֆիդել Կաստրո Դիազ-Բալարթին և Հայաստանում Կուբայի արտակարգ և լիազոր դեսպան Էմիլիո Լոսադա Գարսիային (նստավայրը՝ Մոսկվա):

Ֆ. Դ-Բալարթ Կաստրոն ներկայացնելով այցի նպատակները՝ նշել է, որ հետաքրքրություն կա հատկապես գիտության ոլորտի հանդեպ, և համագործակցելու, կապեր հաստատելու ակնկալիքով հանդիպումներ է ունեցել ՀՀ ԿԳՆ գիտության պետական կոմիտեում: Կարևորելով Հայաստան-Կուբա գիտակրթական հարաբերությունների ձևավորումը՝ ՀՀ ԿԳ նախարարի առաջարկությամբ կողմերը պայմանավորվել են նախապատրաստել հուշագիր՝ կրթության և գիտության ոլորտում համագործակցության վերաբերյալ: Նախարարն առաջարկել է բուհական համագործակցության և կրթաթոշակային երկկողմ ծրագրեր իրականացնել, ինչպես նաև Հայաստանի որոշ ավագ դպրոցներում իսպաներենի խորացված ուսուցում կազմակերպել՝ շեշտելով, որ այլ լեզուների ուսուցման համանման փորձն առկա է:

Սա պաշտոնական մասն է, որն իր սառը ձևակերպումների տակ բավականին հետաքրքիր տեղեկատվություն է թաքցնում: Փաստորեն, ՄԱԿ-ում հայտնի քվեարկության արդյունքում ակամա ձևավորված նոր աշխարհակարգի հերոսները սկսել են սերտացնել հարաբերությունները միմյանց հետ: Հասկանալով, որ հասունացող սառը պատերազմի արդյունքում հայտնի երկրները' Բելառուսը, Վենեսուելան, Սուդանը, Սիրիան, Հյուսիսային Կորեան, Զիմբաբվեն, Բոլիվիան, Կուբան և Նիկարագուան իր հետ միասին կարող են հայտնվել լիակատար մեկուսացման մեջ (վերոնշյալ բոլոր երկրները միջազգային մեկուսացման պատկառելի փորձ ունեն)' հավանաբար Ռուսաստանի իշխանությունները հրահանգել են իրենց ֆորպոստային իշխանիկներին' տարատեսակ համագործակցության եզրեր մշակել միմյանց հետ:

Հակառակ պարագայում տարօրինակ է իշխանությունների ցանկությունը' Հայաստանի ավագ դպրոցներում իսպաներենի խորացված ուսուցումը կազմակերպել Կուբայի իշխանությունների հետ համագործակցված: Վստահաբար, Իսպանիան մշտապես աջակցել և աջակցելու է իսպաներենի տարածմանը տարբեր երկրներում, և Հայաստանում իսպաներեն լեզվի ուսուցում մշտապես կազմակերպվել է: Ինչո՞ւ որոշեցին Կուբայի հետ նման ծրագիր քննարկել' անհասկանալի է. հավանաբար իսպաներենի ուսուցումը միակ բնագավառն է, որտեղ Կուբայի հետ հնարավոր է ընդհանուր եզրեր գտնել:

Հերոսական ժողովուրդների միասնական ճակատը, Ուկրաինայի տարածքային ամբողջականությանը միասնաբար դեմ քվեարկելով, ձեռք ձեռքի տված, ոչ ասաց իմպերալիստական Արևմուտքի զավթողական քաղաքականությանը: Այժմ ժամանակն է' եղբայրական ժողովուրդների միջև ստեղծել հարաբերություններ: Կարևոր չէ' ինչ հարաբերություններ, կարևորն այն է, որ դրանք ստեղծվեն: Հավանաբար մի քանի օրից հայ վարսավիրների ասոցիացիան կընդունի Հյուսիսային Կորեայի համապատասխան կառույցին և կքննարկի մեծ առաջնորդ Կիմ Չեն Ինի սանրվածքը Հայաստանում տեղայնացնելու հարցը: Հուսանք, որ փորձի փոխանակման արդյունքում Հայաստանի իշխանություններն իրենց քեռիներին չեն գցի շների մոտ' հոշոտման, ինչպես արդարացիորեն արել է եղբայրական երկրի մեծ առաջնորդը...

Վարուժան Բաբաջանյան