«Հրապարակ». Հայկական բողոքական եկեղեցին յուրացրե՞լ է սիրիահայերին տրամադրվող օգնությունը

Վերջերս ՀՀ ոստիկանության ուշադրության կենտրոնում հայտնվեց հայկական բողոքական եկեղեցին, ավելի շուտ, այդ եկեղեցու հոգեւոր հովիվ Հովհաննես Հալաջյանը: Այս եկեղեցին վերջին մեկ տարում սիրիահայերին մարդասիրական օգնություն էր ցուցաբերում՝ ստանում էր արտասահմանյան բարեգործներից գումարներ եւ բաժանում էր դրանք Հայաստանում գտնվող մոտ 160 սիրիահայ փախստականների: Այս բարեգործական գումարները, մեր տեղեկություններով, մեկ տարում շուրջ 40 հազար դոլար են կազմել: Սակայն փետրվար ամսին ամերիկյան բարեգործը՝ Մայք Յուսսեֆյանը, ով հավաքում էր սիրիահայերի համար գումարները եւ ուղարկում էր բողոքական եկեղեցուն, Երեւանից տեղեկություն է ստացել այն մասին, որ փողն ընդամենը մի երկու ամիս է բաժանվել սիրիահայերին, իսկ հետո օգնության տրամադրումը պարզապես դադարեցվել է: Երեւանյան աղբյուրը բարերարին հայտնել է նաեւ, որ Հովհաննես Հալաջյանը կեղծ հաշվետվություն է ներկայացրել իրեն, որ նա մի քանի անգամ պատճենահանել է օգնություն ստացած սիրիահայերի առաջին ամսվա ցուցակը եւ ուղարկել է այն իբրեւ նոր գումարների բաժանման ապացույց:

Սակայն իրականում հաջորդ ամիսներին նա փող չի բաժանել, իսկ ստացված միջոցները յուրացրել է: Ամերիկյան բարեգործը նամակ է գրել սփյուռքի նախարարություն, նաեւ ՀՀ դատախազություն, խնդրելով պարզել իրողությունը, եւ եթե փաստերը համապատասխանում են իրականությանը, պատժել հոգեւոր հովվին: Բանը հասնում է նրան, որ Հալաջյանից պահանջում են թողնել եկեղեցին, հանձնել կնիքն ու փաստաթղթերը, սակայն վերջինս չի ենթարկվում այս հրահանգին, վստահեցնելով, որ իրեն զրպարտել են: ՀՀ ոստիկանության Կենտրոնականի քննչական բաժնում սկսվում է հետաքննություն, քանի որ սիրիահայերը հաճախ են փոխում բնակության վայրը, ցուցակներում նշված մարդկանցից ոչ բոլորին են կարողանում գտնել, ինչը բարդացնում է հետաքննությունը: Քննիչները չեն կարողանում պարզել, թե, ի վերջո, որքան գումար են ստացել սիրիահայերը, քանի մարդու են դրանք բաժանվել: Ինչեւէ, քննիչ Բ. Գալստյանը 20.03.2014 թվականին կայացրել է քրեական գործի հարուցումը մերժելու եւ քրեական հետապնդում չիրականացնելու մասին որոշում: Քննիչը պաշտոնապես հաստատել է, որ «Օհաննես Հալաջյանի արարքում բացակայում է ՀՀ քրեական օրենսգրքով նախատեսված որեւէ հանցագործության հանցակազմը»: Մենք փորձեցինք զրուցել այս պատմության բոլոր կողմերի հետ:

«Քցված» սիրիահայերի շահերը ներկայացնող Հակոբ Հովհաննիսյանը հրաժարվեց պատասխանել մեր հարցերին, իսկ Հովհաննես Հալաջյանն ասաց, որ իրեն պարզապես զրպարտել են: «Լինում են դեպքեր, երբ նախանձողների զոհ ենք դառնում: Ոչինչ, թող Աստված ների բոլորին: Գալով ստորագրություններին, բացարձակապես իրականությանը չի համապատասխանում, որ ես ստորագրություններ եմ պատճենահանել:

Ես վերջին 15 տարիներին բարեխղճորեն եւ հոգեւոր խիստ սկզբունքով ծառայել եմ եւ շարունակում եմ ծառայել իմ հայրենիքում իմ շատ սիրելի հայրենակիցներին: Բազում առիթներով սխալ եմ հասկացվել, զրպարտվել եւ մեղադրվել, բայց մեծ սիրով, զոհողությամբ, նվիրումով եւ անշահախնդիր շարունակել եմ իմ անձնատուր ծառայությունը եւ աստծո կամոք շարունակելու եմ: Հոգ չէ, թե մարդիկ ինչ կմտածեն կամ ինչպես կդիրքորոշվեն իմ նկատմամբ»,- պատասխանեց նա: Նա նաեւ ժխտեց, որ որեւէ մեկը ցանկացել է իրեն հեռացնել եկեղեցու հոգեւոր հովվի պաշտոնից: Բայց ո՞ւմ էր պետք իրեն զրպարտելը եւ ինչո՞ւ: Սա Հովհաննես Հալաջյանը բացատրում է մարդկային չարությամբ: Ըստ նրա, երկու սիրիահայ, որոնց ազգանուններն ինքը չի տալիս, Նիկողոսը եւ Հակոբը, փորձել են շանտաժի ենթարկել իրեն: Մասնավորապես, Նիկողոս անունով անձն իրենից 500 դոլար է պահանջել, վստահեցնելով, որ հակառակ դեպքում խայտառակ կանի նրան, սակայն ինքը չի համաձայնել:

Մենք զանգահարեցինք նաեւ սփյուռքի նախարարություն, պարզելու համար, թե արդյոք տեղյա՞կ են այս մութ պատմությանը, եւ ի՞նչ է անում նման դեպքերում նախարարությունը, ինչպե՞ս է օգնում «քցվածներին»: Նախարարության աշխատակազմի ղեկավար Ֆիրդուս Զաքարյանը մեզ ասաց, որ նախարարությունը տեղյակ է այս պատմությանը, շատ է ուզում, որ այս պատմությունը բացահայտվի մինչեւ վերջ, եւ որ սա դաս լինի այն մարդկանց համար, որոնք սիրիահայերի անունով փող են հավաքում, շրջանցելով սփյուռքի նախարարությանը:

Շարունակությունը` «Հրապարակ» օրաթերթի այսօրվա համարում: