«Հրապարակ». ԲՀԿ փոքր իսկ անկանոն շարժման դեպքում բոլոր գործարար պատգամավորները տարհանվելու են դեպի ՀՀԿ

ՀՀԿ ԳՄ վերջին նիստի ժամանակ, երբ ծերերը ներկայացրել են ԲՀԿ-ի հետ խորհրդարանական անցուդարձն ու հակամարտությունը, սպասվող բարիկադային ցնցումները, Սերժ Սարգսյանը լռել, քթի տակ չարախինդ ժպտացել է: Մեր տեղեկություններով, արդեն իսկ կա որոշում` «սկսելու»: ԲՀԿ փոքր իսկ անկանոն շարժման դեպքում բոլոր գործարար պատգամավորները տարհանվելու են դեպի ՀՀԿ, նրանց հետ արդեն իսկ աշխատանք է տարվում: Վերջիններս, ի դեպ, ամենեւին էլ դեմ չեն «թուլանալուն ու հաճույք ստանալուն», քանզի շատ են հոգնել արդեն մի քանի տարի շարունակվող երկդիմի վիճակից:

Իր հերթին Ծառուկյանի մտերիմները մասնավոր զրույցներում դժգոհում եւ բացահայտ ասում են' Քոչարյանը թող ինքը մտնի հրապարակային խաղի մեջ, ուրիշի ձեռքերով դա չանի: Ի դեպ, միանշանակ չէ նաեւ Դուբայ մեկնած Ծառուկյանի վիճակը. մի կողմից նա կանչել է ԲՀԿ համամասնական ցուցակի հիսուն համարից այն կողմ գտնվող բոլոր թեկնածուներին, պահանջել հրաժարականի դիմումներ գրել, որպեսզի գործարարների դուրս գալու դեպքում կարողանա ճիշտ ընտրություն կատարել, մյուս կողմից էլ հարազատ մի միջավայրում ինքը նույնպես նեղվել է իրեն «բարիկադային» խաղի մեջ ներքաշելուց:

Ի դեպ, առաջիններից մեկը, որ «բարիկադների» դեպքում կհայտնվի «պրիցելի» տակ, Աբովյանի քաղաքապետ Կարո Գուլոյանն է, որի նկատմամբ ինչ-ինչ գործընթացներ են արդեն սկսվել:

Շարունակությունը` «Հրապարակ» օրաթերթի այսօրվա համարում: