«...Մի օր էլ ծիծաղենք». Նիկոլայ Ծատուրյան

Հումորն այսօր դարձել է շատ ավելի մակերեսային, կոպիտ, գռեհիկ, քան առաջ էր: Ծիծաղի և հումորի համաշխարհային օրվա հետ կապված նման կարծիք հայտնեց ՀՀ ժողովրդական արտիստ Նիկոլայ Ծատուրյանը: Ռեժիսորի խոսքով` հայերի հումորը բավական ճակատային է, ինչը չես ասի, օրինակ, անգլիացիների դեպքում, որը բավական նուրբ է և շատ ավելի ենթատեքստեր ունի: «Վերջերս հայերը դուր գալու համար սկսել են ցենզուրայից դուրս բաներ անել: Նուրբ հումորը ընտրյալ հասարակությանը պատկանող մարդկանց համար է, ովքեր բավական քիչ թիվ են կազմում»,- ասաց նա:

Ծատուրյանը նշեց, որ ապրիլի 1-ն իսկապես պետք է ծիծաղով անցկացնել: «Մեզ մոտ 364 օր խաբելու օր է, մի օր էլ ծիծաղենք: Երևի խաբելն էլ իր մեջ հումոր ունի, դրա համար էլ մարդիկ իրար խաբում են' առանց չար մտքերի»,-ասաց նա:

ՀՀ ժողովրդական արտիստը վերհիշեց նաև մեր մեծերին, որոնց կյանքում հումորը ևս առանձնահատուկ դեր է խաղացել: «Այսօր մեր մեծանուն դերասան Խորեն Աբրահամյնաի ծննդյան օրն է: Նա էլ էր շատ սիրում հումոր անել' չնայած որ Խորենի հումորը բավական նուրբ էր, ի տարբերություն Մհեր Մկրտչյանի հումորի»,-ասաց Ծատուրյանը:

Անդրադառնալով գյումրեցիների հումորին' նա նշեց, որ նրանք աչքի են ընկնում բավական սրամիտ և առանձնահատուկ հումորով:

Հայաստանի կառավարությունը 2006թ. փետրվարի 16-ի որոշմամբ ապրիլի 1–ը պետականորեն ճանաչել է որպես Հումորի և երգիծանքի օր: