«Ազգ». Սարգսյան-Ալիև հանդիպման շուրջ չարդարացված հույսեր

Ցանկություն ու նպատակ կար, որ դեռևս այս տարեսկզբին Հայաստանի և Ադրբեջանի նախագահների հանդիպում նախապատրաստվեր: Հանդիպման հնարավորության և նախապատրաստման մասին իր թվիթերյան միկրոբլոգում տեղեկացրել էր ԵԱՀԿ Մինսկի խմբի ամերիկացի համանախագահ Ջեյմս Ուորլիքը: Գրում է «Ազգ»-ը:

Հայաստանի ու Ադրբեջանի նախագահներն իսկապես Միջուկային անվտանգության գագաթաժողովի շրջանակներում Հաագա այց կատարեցին, բայց նախագահների հանդիպում այդպես էլ տեղի չունեցավ:

Ալիև կրտսերը գագաթաժողովի ընթացքում հարկ համարեց անդրադառնալ Մեծամորի ատոմակայանինՙ ավանդական դարձած անվտանգության հարց բարձրացնելու ցանկությամբ: Հայաստանի նախագահն էլ հարկ համարեց անդրադառնալ նիստում Ադրբեջանի նախագահի բամբասկոտ հարցադրմանըՙ կրկին հավաստիացնելով Մեծամորի ատոմակայանի անվտանգության մասին:

Ըստ Սերժ Սարգսյանի խոսքերի, Հայաստանը սերտորեն համագործակցում է Ատոմային էներգիայի միջազգային գործակալության հետ հայկական ատոմակայանի անվտանգության ապահովման հարցումՙ հետևողականորեն կատարելով գործակալության սահմանած պահանջները:

Փաստացի բանակցությունների հնարավոր հանդիպման հերանկարով Հաագա մեկնած նախագահները նույն պատերազմող իրավիճակում էին հենց այնտեղ, որտեղ պետք է նստեին սեղանի շուրջն ու փորձեին հարցեր համաձայնեցնել: Անվստահության մթնոլորտն առանց աշխարհակարգի փոփոխության բերող ուկրաինական զարգացումների էլ հնարավորություն չի տալիս դեպի առաջ քայլ անելու, թեկուզ շատ փոքր:

Ասել է, թե ոչինչ չփոխվեց ոչ միայն գլոբալ առումով, այլև ավելի ցածր մակարդակում. նախագահների հանդիպումը դեռևս մնում է չարդարացված հույս կամ ցանկություն:

Ակնհայտ է նաև, որ համանախագահները, ուկրաինական զարգացումների ֆոնին, քայլ անելու անհրաժեշտությունից արդեն որերորդ ամիսն է փորձում են կազմակերպել Սարգսյան-Ալիև հանդիպումը, որն այդպես էլ չի հաջողվում: Երևի անհրաժեշտ է այնպիսի մի միջամտություն, որը մի որոշ ժամանակ առաջ նախագահների հանդիպումների շարքով իրավիճակը հասցրեց Կազանի հանդիպմանըՙ թեև անհաջող ելքով:

Միևնույն ժամանակ կարևոր ու վտանգավոր է, որ լարվածությունը սահմանին և շփման գծում չի թուլանում: Ավելին, Ադրբեջանում հաճախակիացել են հոխորտանքները, թե հարցի լուծումը ռազմական է, դեռ Հայաստանի կեսն էլ հետը պետք է Ադրբեջան կազմի: Սրան էլ գումարվում են տեղեկությունները, թե ինչպես է Ադրբեջանը շարունակում զինվել, հզորացնել ռազմական իր բազան:

Մանրամասները` «Ազգ» շաբաթաթերթում: