ՀՀԿ-ն միասնական թիմ է. Արտակ Դավթյան

Հայաստանի Հանրապետական կուսակցությունը թևերի բաժանված չէ և միասնական թիմ է: Այս մասին ապրիլի 2-ին լրագրողների հետ հանդիպմանը նշեց ԱԺ ՀՀԿ խմբակցության պատգամավոր Արտակ Դավթյանը՝ անդրադառնալով հարցին, թե կարող են այդ թևերը միմյանց դեմ դուրս գալ ԱԺ չորս ոչ իշխանական ուժերի կողմից կառավարությանն անվստահություն հայտնելու հարցի քննարկման ժամանակ: «Ես կարծում եմ, որ անիմաստ զբաղմունք է նստել և խոսել ինչ-որ թևերի մասին, որոնք ուղղակի գոյություն չունեն: Մենք մեկ միասնական թիմ ենք»,-շեշտեց Դավթյանը:

Նա հիշեցրեց, որ ՀՀԿ-ն կայացած քաղաքական ուժ է, և կուսակցության ներսում պառակտումներ չկան: «Կրկնում եմ` «Հանրապետականը» միասնական թիմ է, ունի իր ղեկավարը՝ հանձին Հանրապետության նախագահի»,- ասաց նա:

Պատասխանելով հարցին, թե ՀՀԿ խմբակցության ոչ բոլոր պատգամավորներն են գոհ երկրում տիրող իրավիճակից, Դավթյանը նշեց, որ բոլորն էլ ընդունում են, որ երկրի առջև լուրջ խնդիրներ կան ծառացած, որ կան արտագաղթ և սոցիալական խնդիրներ, սակայն դա չի նշանակում, որ բոլորը դեմ են կառավարության գործունեությանը: Նրա խոսքով՝ հարկավոր է համատեղ քայլեր ձեռնարկել երկրի առջև ծառացած խնդիրներին լուծում տալու համար:

Ապրիլի 28-ին ԱԺ ոչ իշխանական խմբակցությունները պատրաստվում են խորհրդարանի քննարկմանը ներկայացնել կառավարությանն անվստահություն հայտնելու որոշման նախագիծը: Քվեարկությունը տեղի կունենա ապրիլի 30-ին: Ոչ իշխնական ուժերը պատրաստվում են ապրիլի 28-30 համատեղ հանրահավաքներ անցկացնել Ազատության հրապարակում: