Ռումինիայի խորհրդարանում դատապարտել են Քեսաբի հայության նկատմամբ բռնությունները

Ռումինիայի խորհրդարանի հայ անդամներ սենատոր Վարուժան Ոսկանյանն/Varujan Vosganian ու պատգամավոր Վարուժան Փամբուկչյանը/Varujan Pambuccian երեկ խորդարանի վերին և ստորին պալատների լիագումար նիստերի ժամանակ ռումինահայ համայնքի անունից հանդես եկան հայտարարությամբ, որով խստորեն դատապարտում են Քեսաբի հայ բնակչության նկատմամբ հարձակումներն ու բռնությունները և միջազգային հանրությանը կոչ անում գործուն միջոցներ ձեռնարկել Քեսաբի հայության անվտանգության երաշխավորման և նրանց բնակության մշտական վայրեր ապահով վերադարձի համար։

«Ռումինիայի հայ համայնքի անունից խստորեն դատապարտում ենք Սիրիայի հայաբնակ Քեսաբ ավանի և շրջակա գյուղերի վրա թուրքական սահմանից ծայրահեղական իսլամիստ գրոհայինների հարձակումները և այդ բնակավայրերի բռնազավթումը, որի արդյունքում 700-ից ավելի հայ ընտանիքներ հարկադրված կերպով տարհանվել են, ավերվել, հրկիզվել և թալանվել են հայ փոքրամասնությանը պատկանվող անշարժ գույքն ու ունեցվածքը, պղծվել են սրբավայրեր»,- ասվում է հայտարարության մեջ։

«Ցանկանում ենք միջազգային հանրությանը հիշեցնել, որ Քեսաբի հայությունը վերջին հարյուրամյակի ընթացքում երրորդ անգամն անընդմեջ ենթարկվում է կոտորածի և բռնի տեղահանության։ 1909թ. ապրիլին թուրքական զինված ջոկատների Քեսաբ ներխուժումից և քաղաքի հրկիզումից հետո հայերն ապաստան գտան Լաթաքիայում։ 1915թ. Հայոց ցեղասպանության օրերին քեսաբահայության մեծամասնությունը մահվան քայլերթով քշվեց դեպի Դեր Զորի անապատները։ Այսօր' Հայոց ցեղասպանության 100-ամյակի նախաշեմին, թվով երրորդ տեղահանությունից քեսաբցիները ունեզրկված և անհայտ ճակատագրով կրկին ապաստանել են Լաթաքիայում:

Կոչ ենք անում միջազգային հանրությանը, Միավորված ազգերի կազմակերպությանը, մարդու իրավունքների և ազգային փոքրամասնությունների հարցերով մասնագիտացված կառույցներին, Եվրոպայի խորհրդին, Եվրոպական միությանը, քաղաքակիրթ մյուս պետություններին, այդ թվում Ռումինիայի և Բուլղարիայի կառավարություններին, խստագույնս դատապարտել Սիրիայի հայ փոքրամասնության նկատմամբ ծայրահեղական խմբավորումների բռնությունները, հետաքննել այդ գործողություններին երրորդ երկրների մասնակցության փաստերը, պաշտպանել Քեսաբի հայկական բնակչությանը և գործուն միջոցներ ձեռնարկել Քեսաբի հայության անվտանգության երաշխավորման և նրանց բնակության մշտական վայրեր ապահով վերադարձի համար»։

Քեսաբի հայության վիճակի վերաբերյալ Ռումինիայի և Բուլղարիայի հայ համայնքների ներկայացուցիչները, մարտի 29-ին բուլղարական սահմանային Ռուսե քաղաքում կայացած միջհամայնքային հանդիպման ժամանակ, հանդես էին եկել նույն բովանդակությամբ համատեղ հայտարարությամբ: Միաժամանակ, դիվանագիտական ուղիներով Ռումինիայի խորհրդարանի և կառավարության ուշադրությունն է հրավիրվել հարցի վրա:

Թուրք-սիրիական սահմանի մերձակայքում և Լաթաքիայի հյուսիսում գտնվող Քեսաբ գյուղաքաղաքի վրա հարձակումը սկսվել է մարտի 21-ին Թուրքիայի սահմանի ութ կետերից: Տեղեկություններ են հաղորդվել, որ հարձակումն իրականացրել են «Ջաբհա ան Նուսրա» և «Ջեյշ ալ Իսլամ» խմբավորումները: Գյուղաքաղաքում գրեթե բնակիչներ չեն մնացել, նրանք տեղափոխվել են առավել ապահով վայրեր: Հայերի մեծամասնությունը ապաստան է գտել Լաթաքիայի Սուրբ Աստվածածին եկեղեցու տարածքի մոտ գտնվող ազգային կառույցներում: Տեղի Հայկական շտապօգնության մարմինը Սիրիայի Կարմիր մահիկի կազմակերպության հետ անհրաժեշտ պարագաներով և սնունդով ապահովել է բնակիչներին: