Իրական քաղաքականությունը վերադառնում է հետխորհրդային տարածք. քաղաքագետ

Ուկրաինական զարգացումների արդյունքում աշխարհաքաղաքական մի իրավիճակ է ստեղծվել, երբ հետխորհրդային տարածք է վերադառնում իրական քաղաքականությունը: Այն որոշ չափով նման կլինի այն իրավիճակին, որն առկա էր Եվրոպայում, Մերձավոր Արևելքում և Արևմուտքում սառը պատերազմի տարիներին: Այս մասին լրագրողների հետ հանդիպմանը նշեց Կովկասի ինստիտուտի փոխտնօրեն, քաղաքական բաժնի ղեկավար, քաղաքագետ Սերգեյ Մինասյանը: «Ստեղծվել է մի իրավիճակ, երբ երկրներում անվտանգության հարցերը դառնում են առավել կարևոր, քան տնտեսական, քաղաքական հարցերը»,- ասաց Սերգեյ Մինասյանը:

Նրա խոսքով' ուկրաինական ճգնաժամն արդեն իր հետքն է թողել Հայաստանի տարածաշրջանային դիրքորոշման վրա և իր դերը կթողնի Հայաստանի ներքին քաղաքական կյանքում: «Հասկանալի է նաև, որ այս իրավիճակում Հայաստանն ստիպված է անել քայլեր, որոնք եթե ոչ լիովին, բայց հակասում են այն դիրքորոշումներին, որոնք Հայաստանն ուներ վերջին երկու տասնամյակում: Եթե քսան տարվա ընթացքում ՀՀ-ն փորձում էր հավասարակշռել իր մոտեցումները կոմպլեմենտարիզմի համատեքստում` այս պահին մենք ունենք այլ իրավիճակ: Չեմ ասում, որ այդ հավասարակշռված քաղաքականությունը չի լինի, դա տեխնիկապես էլ հնարավոր էլ չէ»,- նշեց քաղաքագետը' կարևորելով տարբեր աշխարհաքաղաքական բևեռների հետ աշխատանքում լուրջ և ազդեցիկ հայկական համայնքների դերը:

Սերգեյ Մինասյանի խոսքով' երբ մի երկիր որոշում է ինչ-որ հարցերում աջակցի ուժեղ դերակատարին, դա կարող է դրական դերակատարում ունենալ տարածաշրջանում: «Ես կարծում եմ, որ դժվար թե մոտակա ժամանակաշրջանում Ադրբեջանը մտածի ռազմական գործողություների վերսկսման առումով»,-ասաց նա:

Քաղաքագետի բնորոշմամբ' Արևմուտքի արձագանքից հասկանալի է, որ այնտեղ ուրախ չեն Հայաստանի արտաքին քաղաքականության մեջ տեղի ունեցող զարգացումների կապակցությամբ: «Երբ խոսքն անվտանգության հարցերի մասին է, պարզ է, որ Հայաստանն ունի իր սեփական շահերը, որոնք միշտ չէ, որ համընկնում են ԵՄ-ի և ԱՄՆ-ի շահերին, առավել ևս, որ նույն այդ սուբյեկտները պատրաստ չեն ավելի շատ ներգրավված լինել Հարավային Կովկասի անվտանգության ապահովման հարցում: Ես կարծում եմ, որ Եվրոպայում, ՆԱՏՕ-ում և Միացյալ Նահանգներում պետք է իրատես լինեն և հասկանան, որ նպատակը ոչ թե Հայաստանի հետ կապերը խզելն է, այլ Հայաստանին սիրաշահելը: Այն, ինչը նրանք չեն ստանա այս պահին, իրենք չեն կարող ստանալ երկար ժամանակ, երբ Ռուսաստանը տարածաշրջանում ուժեղացնի իր դիրքերը»,-կարծիք հայտնեց Սերգեյ Մինասյանը:

Խոսելով Քեսաբի դեպքերի առնչությամբ Ռուսաստանի ակտիվության մասին' Սերգեյ Մինասյանը նշեց, որ դա Ռուսաստանի համար երկակի կարևոր քայլ է: «Ռուսաստանը գիտակցում է, որ այդ քայլով կարող է ամրապնդել Հայաստանի հետ ռազմաքաղաքական դաշնակցությոնը և իր գործողություններով դա ցույց է տալիս: Մյուս կողմից էլ' ՌԴ-ն փորձում է օգտագործել ցանկացած հնարավորություն իր տարածաշրջանային քաղաքականությունը զարգացնելու հարցում թե' Հարավային Կովկասում, և թե' Մերձավոր Արևելքում»,- ասաց քաղաքագետը: