ԼՂՀ ԱԺ նախագահը Բեռլինում հանդես է եկել «Ղարաբաղն այսօր. ակնկալիքները, մտահոգությունները, հեռանկարները» թեմատիկ ելույթով

ԼՂՀ Ազգային ժողովի նախագահ Աշոտ Ղուլյանի գլխավորած պատվիրակությունն աշխատանքային այցով գտնվում է Գերմանիայի Դաշնային Հանրապետության մայրաքաղաք Բեռլինում: Պատվիրակության կազմում են ԼՂՀ արտաքին գործերի փոխնախարար Ֆելիքս Խաչատրյանը և ԳԴՀ-ում ԼՂՀ մշտական ներկայացուցիչ Հարություն Գրիգորյանը: Ինչպես տեղեկացնում է «Արցախպրես»-ը, այցի ծրագրի շրջանակներում պատվիրակությ ունն ապրիլի 1-ին այցելել է Պոտսդամում գտնվող Յոհան Լեփսիուսի տուն-թանգարան, որտեղ արցախցի բարձրաստիճան հյուրերին դիմավորել է հաստատության տնօրեն Ռոլֆ Հոսֆելդը։ Ներկայացնելով թանգարանի պատմությունը, գործունեության ուղղությունները և նպատակները` նա պատմել է նաև Հայոց ցեղասպանությանը վերաբերող փաստերի հավաքագրմանը, դրանց մասին գերմանական ու միջազգային հանրությանն իրազեկելու ուղղությամբ բողոքական եկեղեցու հոգևորական, հայ ժողովրդի մեծ բարեկամ Յոհաննես Լեփսիուսի գործադրած ջանքերի մասին:

ԼՂՀ Ազգային ժողովի նախագահը գոհունակություն է հայտնել թանգարանի կողմից կատարվող աշխատանքի առթիվ, ապա, գրառում կատարելով հաստատության հյուրերի պատվո գրքում, տնօրենի հետ քննարկել է հետագա համագործակցության հարցեր:

Օրվա երկրորդ կեսին Բեռլինի Եվրոպական ակադեմիայում տեղի է ունեցել «Լեռնային Ղարաբաղի դերն ու նշանակությունը Հարավային Կովկասի զարգացման գործում» խորագրով միջոցառում, որտեղ «Լեռնային Ղարաբաղն այսօր. ակնկալիքները, մտահոգությունները, հեռանկարները» թեմատիկ ելույթով որպես գլխավոր բանախոս հանդես է եկել Արցախի խորհրդարանի նախագահը:

Անդրադառնալով ԼՂՀ ձևավորման և կայացման գործընթացներին` նա իր խոսքում ներկայացրել է ադրբեջանա-ղարաբաղյան հակամարտության կարգավորման արդի փուլը, շեշտել, որ երկարատև խաղաղության հասնելու ամենակարճ ճանապարհը երկու անկախ պետությունների՝ Լեռնային Ղարաբաղի Հանրապետության և Ադրբեջանի Հանրապետության միջև խաղաղ գոյակցության հիմքերի ստեղծումն է:

Միջոցառման երկրորդ հատվածում տեղի է ունեցել բանավեճ-քննարկում, որին Աշոտ Ղուլյանից բացի, հրավիրված են եղել նաև գերմանական խորհրդարանի՝ Բունդեսթագի նախկին պատգամավոր Վոլֆգանգ Բյորնզեն, Գիտության և Քաղաքականության հիմնադրամից դոկտոր Ուվե Հալբախը և Համբուրգի համալսարանից իրավաբանության պրոֆեսոր Օտտո Լուխտերհանդտը: Բանավեճը վարել է ակադեմիայի տնօրեն պրոֆեսոր Էքարտ Շտրատենշուլտեն: Միջոցառմանը ներկա է եղել նաև ԳԴՀ-ում ՀՀ դեսպան Վահան Հովհաննիսյանը:

Հրավիրված փորձագետները ներկայացրել են իրենց տեսակետներն Արցախի ժողովրդի ինքնորոշման իրավունքի իրացման, ադրբեջանա-ղարաբաղյան հակամարտության կարգավորմանն ուղղված միջնորդական ջանքերի, տարածաշրջանային զարգացման հեռանկարների և այլ հարցերի վերաբերյալ: Այնուհետև բազմամարդ միջոցառման մասնակիցները հնարավորություն են ունեցել բանախոսներին դիմել տարաբնույթ հարցերով, որոնց տրվել են հարկ եղած պատասխաններ ու պարզաբանումներ: