ԼՂՀ իշխանությունները հետևողական են հայության ազգային դիմագծի պահպանման հարցում. Արա Հարությունյան

Արցախի Հանրապետության վարչապետ, Արցախի պետական համալսարանի խորհրդի նախագահ Արա Հարությունյանը ապրիլի 2-ին հանդիպել է այդ բուհի պատմության և քաղաքագիտության ֆակուլտետի ուսանողների հետ: Կառավարության ղեկավարը ողջունել է ուսանողների՝ իր հետ հանդիպելու նախաձեռնությունը, կարևորելով նմանատիպ հանդիպումների նշանակությունը իշխանություն-քաղաքացիական հասարակություն կապի ապահովման, երիտասարդության կարծիքը լսելու, ինչպես նաև պետական համակարգում աշխատելու համար նոր կադրեր ընդգրկելու գործում:

Վարչապետն անդրադարձել է Արցախում խորհրդային շրջանի սոցիալ-տնտեսական և քաղաքական պայմաններին՝ նշելով, որ արցախահայությունն անընդհատ սեփական ինքնության դեմ ուղղված ոտնձգությունների ականատեսն էր: Մասնավորապես, չէր թույլատրվում ազգային տոները նշել, դպրոցներում հայերենի դերը երկրորդ պլան էր մղված և այլն: Արա Հարությունյանը շեշտադրել է, որ արցախահայությունը վճռական է իր ինքնության պաշտպանության խնդրում և պատերազմով է վաստակել իր անկախության իրավունքը: Ըստ նրա՝ Արցախի բնակիչներն ընտրել են ժողովրդավարական զարգացման ճանապարհը և այդ ուղղությամբ գրանցել նշանակալի հաջողություններ:

Վարչապետը, պատասխանելով կուսակցական համակարգի կայացվածության վերաբերյալ հարցին, նշել է, որ Արցախում այն միայն վերջին տարիներին է ձևավորման փուլ մտել, ինչը պայմանավորված է սահմանադրության ընդունմամբ և ընտրական համակարգում համամասնական համակարգի ներդրմամբ: Նա հավելել է, որ հաջորդ տարվանից արհեստավարժ Ազգային ժողովի աշխատանքների մեկնարկը լրացուցիչ խթան կհաղորդի կուսակցաշինությանը:

Աղանդավորության դեմ պայքարի վերաբերյալ հարցին ի պատասխան՝ վարչապետն ընդգծել է, որ Արցախում այդ խնդիրը թույլ է արտահայտված, քանի որ օրենքը խիստ է աղանդավորական կազմակերպությունների նկատմամբ: Նրա խոսքով՝ տարիներ առաջ, երբ խստացվեց կրոնական ազատությունների վերաբերյալ օրենքը, «Ֆրիդոմ հաուզ» միջազգային իրավապաշտպան կազմակերպությունը միայն այդ պատճառով իջեցրեց Արցախի Հանրապետության ժողովրդավարացման գնահատականը: Սակայն, ըստ Արա Հարությունյանի, հայության ազգային դիմագծի պահպանումն առավել կարևոր հարց է, և ԼՂՀ իշխանությունները հետևողական են այդ գործում:

Անդրադառնալով հանրապետության արևելյան և հարավային շրջանների սահմանամերձ տարածքները զարգացնելու նախագծերին՝ կառավարության ղեկավարը մատնանշել է Արաքսի հովտում մեկնարկած մի շարք խոշոր նախագծեր, որոնք, ըստ նրա, ցրում են այդ տարածքների քաղաքական ապագայի վերաբերյալ կասկածները: Արա Հարությունյանի խոսքով՝ խնդիրը միայն ռեսուրսների սղության մեջ է. աստիճանաբար զարգացվում են Արցախի այդ տարածքները, կառուցվում համապատասխան ենթակառուցվածքներ՝ ըստ առաջնահերթության:

Արտագաղթի վերաբերյալ հարցին ի պատասխան՝ գործադիրի ղեկավարը նշել է, որ Արցախում, ինչպես բոլոր երկրներում, կա բնակչության փոքր ծավալի արտահոսք, որն ավելի շատ արտահայտվում է ժամանակավոր աշխատանքային արտագաղթի տեսքով: Դրան զուգահեռ, ըստ Արա Հարությունյանի, վերջին տարիներին գրանցվել է զգալի ժողովրդագրական աճ՝ թե′ մեխանիկական, թե′ բնական աճի տեսքով: Նա շեշտել է, որ եթե 2002-2007թթ. Արցախում տարեկան ծնվում էր շուրջ 2100 երեխա, ապա 2008-2013թթ. այդ թիվը տատանվում էր 2500-2600-ի սահմաններում՝ ապահովելով շուրջ 20 տոկոս ծնելիության աճ: Վարչապետը կարևորել է տնտեսական զարգացումը և′ արտագաղթի կանխման, և′ ժողովրդագրական բնական աճ ապահովելու ուղղությամբ: Նա տնտեսական զարգացման ճանապարհին կառավարության աշխատանքը գնահատել է բավարար, քանի որ վերջին վեց տարիների ընթացքում հաջողվել է գրանցել տարեկան մոտ 9 տոկոս ՀՆԱ-ի աճ:

Վարչապետ Արա Հարությունյանը պատասխանել է ուսանողներին հուզող մի շարք հարցերի ևս: Հանդիպման վերջում նա վարչապետի հուշամեդալով է պարգևատրել ԱրՊՀ պրոֆեսորադասախոսական կազմի մի շարք ներկայացուցիչների: Կառավարության ղեկավարը շնորհակալություն է հայտնել պարգևատրվողներին իրենց հայրենանվեր աշխատանքի համար՝ կարևորելով նրանց դերը սերունդների դաստիարակության գործում: