«Հայաստանյան համացանցի վրա DDoS հարձակումը չի թուլանում». փորձագետ

Հայաստանյան համացանցի վրա հզոր DDoS հարձակումը չի թուլանում: Հարձակման թիրախում է բիզնես կայքերից մեկը: Այդ մասին «Արմենպրես»-ի հետ զրույցում նշեց փորձագետ Սամվել Մարտիրոսյանը` հավելեով, որ նմանատիպ երևույթների դեմ պայքարի ազգային ծրագրի անհրաժեշտություն կա:

«Մոտավորապես 15 րոպե առաջ եմ նայել, հարձակման արագություն գրեթե նույնն է, որոշ չափով բարձրանում-իջնում է, բայց առանձնապես տարբերություն չկա»,- ասաց Մարտիրոսյանը՝ հավելելով, որ վայրկյանում շուրջ 35 գիգաբիթ «աղբ» է լցվում հայաստանյան ցանցի վրա, որը համեմատելի է մեր երկրում ինտերնետի սպառման արագություններին:

Անդրադառնալով DDoS հարձակման թիրախ կայքին՝ փորձագետը նշեց, որ այն լրատվամիջոց չէ և կապված է բիզնեսի հետ: «Փաստ չէ, որ այդ կայքն է կոնկրետ թիրախը, ուղղակի հնարավոր է, որ այդ կայքն օգտագործում են որպես թիրախ՝ ընդհանուր ցանց մտնելու համար»,- պարզաբանեց Մարտիրոսյանը:

Ինչ վերաբերում է ստեղծված իրավիճակում հնարավոր հակաքայլերին` փորձագետն ասաց, որ դրանց հնարավորությունները կան և այդ հակաքայլերը իրականացվում են, քանի որ կապն առկա է: Նա հիշեցրեց, որ սա վերջին կես տարվա մեջ արդեն 4-5-րդ մեծ հարձակումն է հայաստանյան ցանցի վրա, և գնալով աճում են հարձակումների հզորությունները:

Ըստ Մարտիրոսյանի` ազգային մակարդակով հարցը լուծելու անհրաժեշտություն է առաջացել: «Մենք ունենք փորձ՝ 2007-ին` Էստոնիայի, 2008-ին` Վրաստանի, երբ նման DDoS հարձակումներով այդ երկրներն ուղղակի դուրս էին շպրտել ցանցից»,- նշեց փորձագետը՝ կարևորելով հանրային քննարկումների ծավալումը պաշտպանական մեխանիզմներ մշակելու հարցում: