«Հրապարակ». Հրաչ Մուրադյանի սպանության իրական կազմակերպիչներին ու մեղավորներին մինչ այժմ չեն հայտնաբերել

Ապրիլի 2-ին լրացավ Պռոշյանի գյուղապետ, ազատամարտիկ, Հայ հեղափոխական դաշնակցության անդամ Հրաչ Մուրադյանի սպանության մեկ տարին։ Սպանության իրական կազմակերպիչներին ու մեղավորներին մինչ այժմ չեն հայտնաբերել: Պռոշյան գյուղում երեկ նրա մահվան տարելիցի կապակցությամբ հոծ բազմություն էր հավաքվել, այնտեղ էին Մուրադյանի հարազատները, ընկերները, ՀՅԴ-անդամներ, այդ թվում՝ պատգամավորներ Արմեն Ռուստամյանն ու Աղվան Վարդանյանը, հարյուրավոր համագյուղացիներ։ Սպանության գործով այսօր փաստացի պատիժ կրող չկա, քանզի Արայիկ Պետրոսյանը, ում մեղադրանք էր առաջադրվել ՀՀ քրեական օրենսգրքի 104-րդ եւ 235-րդ հոդվածներով, շուրջ 10 ամիս կալանքի տակ գտնվելուց հետո՝ դեկտեմբերի 25-ին, ազատ արձակվեց. խափանման միջոց կալանավորումը փոխվեց չհեռանալու մասին ստորագրությամբ։ Արայիկին ազատ արձակեցին նրա հարազատների համառ ջանքերի շնորհիվ, քանզի նրանք ամիսներ շարունակ բողոքի ակցիաներ էին կազմակերպում, դիմումներ հղում, հայտարարություններ անում առ այն, որ նա ապօրինի է պահվում անազատության մեջ։

ԱԺ ՀՅԴ խմբակցության ղեկավար, ՀՅԴ գերագույն մարմնի անդամ Արմեն Ռուստամյանն ասաց, որ իրենց ամբողջ մտահոգությունն ու դժգոհությունը՝ կապված այս ամբողջ գործընթացի հետ, այն է, որ անցել է արդեն մեկ տարի, սակայն սպանությունը չի բացահայտվել, եւ հենց դա է, որ իրենց ցասումը, իրենց բողոքը բազմապատկում է, որովհետեւ, ըստ Ռուստամյանի, մեր իշխանություններն այդպես էլ չկարողացան գիտակցել ու գնահատել, որ սա պարզ սպանություն չէր։

«Այն ուներ լուրջ քաղաքական դրդապատճառներ, որովհետեւ կատարվել էր հստակ նպատակով՝ կասեցնելու Հրաչի պաշտոնավարումը համայնքապետի պաշտոնում, եւ դա չի կարող համարվել կենցաղային հողի վրա կատարված սպանություն: Ակնհայտ է, որ սա մի մեծ շղթայի օղակն էր, որովհետեւ Հրաչի շուրջ միշտ էլ ահաբեկումների, ճնշումների, սպառնալիքների մթնոլորտ էր ձեւավորված, բայց, պարզապես, Հրաչն էն տեսակը չէր, որ նահանջեր, եւ վերջին, էսպես ասած, ճիգերը գործադրելով, որ ընտրությունների ժամանակ գոնե կարողանան Հրաչին հանեն էդ պաշտոնից, չստացվեց, ու անցան այս տմարդի արարքին։ Այս հանցագործությունն իր մեջ շատ լուրջ հետեւանքներ ենթադրող եւ բովանդակություն պարունակող հանցագործություն էր, բայց իշխանություններն այդ որակով չգնահատեցին»,- կարծում է Ռուստամյանն ու նկատում, որ սա հարված է ոչ միայն Հրաչի ընտանիքին ու մերձավորներին, այլեւ մեր պետությանը, մեր հեռանկարին:

Նրա կարծիքով՝ իշխանությունները կամ չեն կարողանում բացահայտել, կամ չեն ուզում, ուստի, ըստ նրա, ճանապարհը մեկն է՝ հեռանան, գա այնպիսի իշխանություն, որը կկարողանա դա անել։ «Մենք ունենք այդպիսի բազմաթիվ քաղաքական դրդապատճառներով կատարված սպանություններ, որոնք մինչ օրս բացահայտված չեն»,-ասաց ՀՅԴ-ական պատգամավորն ու ավելացրեց, որ իրենք բոլոր ատյաններն անցել են, հասել են մինչեւ նախագահ, ստացել են համապատասխան հավաստիացումներ, բայց դա եղել է սոսկ խոստում, քանզի հատուկ քննչական խումբը, որ ստեղծվել է, հայտնի չէ, թե ինչ է անում:

Թերեւս դա էր պատճառը, որ պռոշյանցիները, հույսները կտրած օրենքից ու արդարադատությունից, որոշեցին դիմել կտրուկ քայլերի։ Նրանք գերեզմանոցից դուրս գալուց հետո շարժվեցին դեպի Երեւան-Աշտարակ մայրուղի եւ փակեցին այն՝ պահանջելով, որ ՀՀ ոստիկանապետն ու գլխավոր դատախազն անձամբ գան եւ պատասխանեն իրենց հարցերին, թե ինչու չի բացահայտվում սպանությունը։ 

Շարունակությունը`«Հրապարակ» օրաթերթի այսօրվա համարում: