Նարեկ Հախնազարյանը Բոստոնի բարեգործագական համերգի հասույթը կուղղի քեսաբահայերի աջակցությանը

Երիտասարդ թավջութակահար Նարեկ Հախնազարյանը բարեգործական համերգ է կազմակերպում' Քեսաբի իրադարձությունների հետևանքներից տուժած հայերին աջակցություն տրամադրելու նպատակով: Բարեգործական համերգը տեղի կունենա ԱՄՆ Բոստոն քաղաքի Carriage House Violins ընկերության դահլիճում ապրիլի 5-ին: Թավջութակահարին երեկոյի ընթացքում կնվագակցի դաշնակահար Յաննիկ Ռաֆալիմանանան: Համերգի ընթացքում կհնչեն Խաչատրյանի, Կոմիտասի, Խուդոյանի, Շոստակովիչի, Ֆորեի և Չայկովսկու գործերը: Նվիրատվության առաջարկվելիք գումարը 50 դոլարն է:

«Նման համերգ նախաձեռնելու գաղափարն առաջացավ այն ժամանակ, երբ Քեսաբը ենթարկվեց հարձակման, սակայն իմ համերգների խիտ գրաֆիկի պատճառով հնարավորություն չունեի այն իրականացնել մոտակա շաբաթների ընթացքում: Եվ երբ ընդամենը 3 օր առաջ պլաններս անսպասելիորեն փոխվեցին ու պարզվեց, որ ես մեկ շաբաթով կլինեմ Բոստոնում, ես անմիջապես զբաղվեցի այս համերգի կազմակերպմամբ, որպեսզի օգնեմ Քեսաբի մեր հայրենակիցներին այս ծանր իրավիճակում: Չեմ ուզում գուշակել, բայց հուսով եմ, որ առավելագույն հնարավոր գումարը կկարողանանք հավաքել' հաշվի առնելով, որ շատ քիչ ժամանակ ունենք միջոցառման կազմակերպման և գովազդի համար»,-«Արմենպրես»-ի թղթակցին ԱՄՆ-ից հաղորդեց Նարեկ Հախնազարյանը:

Հախնազարյանը շնորհակալություն հայտնեց ԱՄՆ-ում Հայաստանի դեսպանությանը և Համահայկական հիմնադրամին' աջակցության համար: «Իհարկե նաև Carriage House Violins ընկերությանը' դահլիճն անվճար տրամադրելու և այս ամբողջը կազմակերպել օգնելու համար»,-եզրափակեց թավջութակահարը:

Թավջութակահար Նարեկ Հախնազարյանը ծնվել է 1988 թվականին, Երևանում, երաժիշտների ընտանիքում: Սովորել է Երևանի Սայաթ-Նովայի անվան երաժշտական դպրոցում' Զարեհ Սարգսյանի դասարանում, ապա Մոսկվայի կոնսերվատորիայում: Համագործակցել և համագործակցում է բազմաթիվ անվանի նվագախմբերի և դիրիժորների հետ: Համերգներով հանդես է գալիս տարբեր երկրներում: 2012-13թթ.-ի համերգաշրջանում Հախնազարյանն առաջին անգամ ելույթ է ունեցել Rotterdam Philharmonic-ի, London Philharmonic-ի, BBC Scottish Symphony Orchestra-ի, Filarmonica della Scala-ի և բազմաթիվ այլ հեղինակավոր նվագախմբերի հետ: Washington Post-ը նրան բնորոշել է որպես «ֆենոմենալ թավջութակահար, ով ներխուժել է միջազգային ասպարեզ՝ 2011թ.-ին նվաճելով Չայկովսկու անվան մրցույթի առաջին մրցանակը և ոսկե մեդալը»:

Իսկ հայաշատ Քեսաբը Թուրքիայի աջակցությամբ հարձակման է ենթարկվել սիրիական զինյալների կողմից մարտի 21-ին: Մի քանի հարյուր ընտանիք լքել է բնակավայրը' ապաստանելով Լաթաքիայում և հարակից քաղաքներում' առանց առաջին անհրաժեշտության իրերի, առանց ապրուստի միջոցների: Ավելի ուշ տեղեկություն է տարածվել, որ նրանց ունեցվածքը թալանվում է ու տարվում Թուրքիա: