ՍԴ նախագահ. «Կուտակային կենսաթոշակների մասին» ՀՀ օրենքը շարունակելու է գործել ամբողջությամբ»

Մինչև սեպտեմբերի 30-ը «Կուտակային կենսաթոշակների մասին» օրենքը գործելու է ամբողջությամբ: Այս մասին Առաջին ալիքի եթերում հայտարարեց ՀՀ Սահմանադրական դատարանի նախագահ Գագիկ Հարությունյանը: «Սահմանադրությամբ հստակ նշված է, որ եթե Սահմանադրական դատարանը տարաժամկետել է, նշանակում է, որ օրենքը շարունակելու է ամբողջությամբ գործել»,- ՝ ասաց Հարությունյանը:

Նա նշեց, որ քաղաքացիները պետք է շարունակեն կատարել կուտակային վճարները, քանի որ օրենքն ամբողջությամբ գործում է: ՍԴ նախագահի խոսքով' Սահմանադրական դատարանի կողմից օրենքի' Սահմանադրությանը հակասող դրույթները ուժը կորցրած կճանաչվեն առավելագույնս մինչև սեպտեմբերի 30-ը: «Այն ձևով, որ այսօր այդ օրենքը ներդրվել է Հայաստանում, չի կարող գործել: Սեպտեմբերի 30-ից հետո աշխատավարձերից կենսաթոշակների պարտադիր գումար պահվելու օրենքը Հայաստանում չի գործելու»,- ասաց Հարությունյանը՝ ընդգծելով, որ, սովորաբար, նման դեպքերում հաջողության են հասել այն երկրները, որոնք մեկտեղել են բաշխողական, պարտադիր կուտակային և կամավոր կուտակային համակարգերը:

Հարցին, թե պետք է արդյոք կիրառել կուտակային համակարգը, Հարությունյանը նշեց, որ աշխարհում չկա որևէ երկիր, որը վերջին տասնամյակների ընթացքում սոցիալական ոլորտներում բարեփոխումներ չի իրականացրել: Նրա խոսքով՝ այսօր աշխարհում ծերացման գործընթաց է տեղի ունենում, իսկ իրեն սոցիալական հռչակած պետությունը պետք է աշխատավարձի և կենսաթոշակի միջև խելամիտ հարաբերակցություն սահմանի' գոնե 50 տոկոսի չափով, ուստի, այս ոլորտում բարեփոխումներն անհրաժեշտ են, սակայն դրանք պետք է լինեն Սահմանադրության պահանջին համապատասխան: «Եթե որևէ պետություն չփորձի զուգորդել պետության, քաղաքացու և գործատուի համարժեք մասնակցությունը, այս խնդիրները չեն կարող լուծվել, և մենք կարող ենք հասնել մի պահի, որ մեկ աշխատողն արդեն երեք թոշակառուի պետք է պահի, իսկ դա անելանելի վիճակ կլինի հետագա սերունդների համար»,- ասաց Հարությունյանն' ընդգծելով, որ չէր կարելի գործատուին դուրս թողնել այս կարևորագույն բարեփոխումից:

ՍԴ նախագահն ընդգծեց, որ հոկտեմբերին ՍԴ-ն արտահերթ նիստ կանցկացնի՝ հասկանալու համար, թե կառավարությունը որքանով է կատարել օրենքում անհրաժեշտ փոփոխությունները և կներկայացնի հետագա անելիքները: