«Հրապարակ». «Պարտադիր կուտակայինի» իրազեկման համար ծախսվել է 175 մլն 533 հազար դրամ

Պարզվում է, որ կուտակային կենսաթոշակի համակարգի մասին իրազեկելու համար 2013 թվականին Կենսաթոշակային համակարգի իրազեկման կենտրոնը, որի նախագահը սոցիալական հարցերի նախարար Արտեմ Ասատրյանն է, ծախսել է մոտ 175 մլն 533 հազար դրամ:

Հակասահմանադրական օրենքը քարոզելու համար այսքանը ծախսվել է մեկ տարում միայն, սակայն կենտրոնը գործել է 2011 թվականից: Դրանց օդ շպրտմանը մասնակցել է մի ամբողջ խորհուրդ, որի հոգաբարձուներից են ՊԵԿ փոխնախագահ Վախթանգ Միրումյանը, ԿԲ նախագահի տեղակալ Ներսես Երիցյանը, նախագահի աշխատակազմի ղեկավարի առաջին տեղակալ Վարդան Արամյանը, արդարադատության փոխնախարար Արամ Օրբելյանը, կառավարության աշխատակազմի, էկոնոմիկայի, աշխատանքի եւ սոցիալական հարցերի նախարարությունների ներկայացուցիչները:

Այս քարոզը, փաստորեն, բավականին անարդյունավետ էր, քանի որ նույնիսկ նախագահն ընդունեց, որ իր քաղաքացիների 80 տոկոսը դեմ է այս համակարգին, եւ, հետեւապես, 175 ու կես միլիոնն օդ շպրտած գումարներ են: Դրանք վերցվել են սոցիալական հարցերի նախարարության Սոցիալական ապահովության պետական ծառայության հիմնադրամից, որը վերջին ամիսներին խրոնիկաբար ուշացնում է մարդկանց ողորմելի թոշակները, բայց անցյալ տարի մոտ 118 մլն է տվել հակասահմանադրական համակարգի քարոզման համար: 2013 թվականի նոյեմբերին, կառավարության որոշմամբ, առանց այդ էլ սուղ պետբյուջեում վերաբաշխում է կատարվել եւ Կենսաթոշակային համակարգի իրազեկման կենտրոնին հատկացվել է 27 մլն 300 հազար դրամ:

Եվս 20 մլն դրամ տրամադրել է ԱՄՆ միջազգային զարգացման գործակալությունը, որն արդեն մի քանի տարի է, ինչ այս հակաժողովրդական քարոզի հիմնական դոնորն է: Հետո էլ զարմանում ենք, թե ինչու էր ԱՄՆ դեսպան Հեֆերնը ելույթներ ունենում հօգուտ կուտակային թալանի: Ի դեպ, մեկ տարում կենտրոնի 5 աշխատակիցներին տրվել է 16 մլն 115 հազար դրամ աշխատավարձ, ինչը նշանակում է, որ նրանցից յուրաքանչյուրը մոտ 300 հազար դրամ աշխատավարձ է ստացել անիմաստ աշխատանքի համար:

Շարունակությունը` «Հրապարակ» օրաթերթի այսօրվա համարում: