«Գաֆէսճեան» արվեստի կենտրոնում մեկնարկում է նոր կրթական ծրագիր

«Գաֆէսճեան» արվեստի կենտրոնը հայտարարում է «Քաղաք Հունդերթվասեր» նոր կրթական ծրագրի մեկնարկը, որն իրականացվում է «Ֆրիդենսրայխ Հունդերթվասեր. Ռեգենթագ» ցուցահանդեսի շրջանակում: Ծրագրի առաջին մասում մասնակիցները շրջայց կկատարեն ցուցասրահում, կծանոթանան Հունդերթվասերի ստեղծագործություններին, նրա հիմնական գաղափարներին և նկարչական ոճին:

Ֆրիդենսրայխ Հունդերթվասերը (1928-2000) 20-րդ դարի հետպատերազմյան արվեստի վառ և հակասական կերպարներից է: «Ջերարդ Լ. Գաֆէսճեան հավաքածուին» պատկանող «Ռեգենթագ» պորտֆոլիոն («Անձրևոտ օր») Հունդերթվասերի ամենահայտնի գործերից է' բաղկացած տասը տպագիր ստեղծագործություններից:

Հաջորդիվ կենտրոնի Ստեղծագործական սրահում կներկայացվի նյութ Հունդերթվասերի ճարտարապետական կառույցների մասին: Ներշնչված ավստրիացի արվեստագետի ճարտարապետական և բնապահպանական մոտեցումներից՝ մասնակիցները կստեղծեն իրենց յուրահատուկ «Քաղաք Հունդերթվասեր»-ի մանրակերտը: «Քաղաք Հունդերթվասեր» ծրագրի շրջանակներում «Գաֆէսճեան» արվեստի կենտրոնը կհամագործակցի «Ուրբանլաբ Երևան» ճարտարապետական գրասենյակի հետ: Ծրագիրը մասնակիցներին հնարավորություն է ընձեռում ծանոթանալու Ֆրիդենսրայխ Հունդերթվասերի ստեղծագործություններին և փիլիսոփայությանը՝ ստեղծելով հրաշալի առիթ՝ վայելելու թանգարանի անմիջական և ստեղծագործական մթնոլորտը: «Քաղաք Հունդերթվասեր» ծրագիրը նախատեսված է 14 տարեկանից բարձր պատանիների և մեծահասակների համար: Ծրագրին մասնակցությունն անվճար է' պարտադիր նախնական գրանցմամբ: