ՀՀ ՊՆ-ն շրջանակային համագործակցություն է ծավալում ՄԱԿ-ի մասնագիտացված կառույցների հետ

ՀՀ պաշտպանության նախարարությունը, հավատարիմ մնալով միջազգային կազմակերպությունների հետ բազմակողմանի ու բաց համագործակցության ծավալման իր մոտեցումներին, և նպատակ հետապնդելով ՊՆ իրավասության շրջանակում ՀՀ ստանձնած միջազգային պարտավորությունների կատարման գործընթացում օգտագործել միջազգային կազմակերպությունների ներուժն ու փորձագիտական աջակցությունը` շրջանակային համագործակցություն է ծավալում ՄԱԿ-ի մասնագիտացված կառույցների հետ: Համագործակցության շրջանակում ապրիլի 4-ին ՀՀ պաշտպանության նախարարի առաջին տեղակալ Դավիթ Տոնոյանն ընդունել է ՄԱԿ-ի մանկական հիմնադրամի /UNICEF/ հայկական գրասենյակի ղեկավար, տիկին Հենրիետ Ահրենսի գլխավորած պատվիրակությանը:

Հանդիպման ընթացքում քննարկվել են ՄԱԿ-ի Երեխայի իրավունքների կոմիտեի 63-րդ նստաշրջանի (2013թ. մայիսի 27-ի) ընթացքում ՀՀ առաջին զեկույցի ամփոփիչ դիտարկումների` ՊՆ իրավասությանը վերաբերող հարցերը, վերհանվող խնդիրների վերացման կամ առաջարկությունների կատարման նպատակով ՊՆ և ՄԱԿ-ի մանկական հիմնադրամի միջև համագործակցության ուղղությունները: Համաձայնություն է ձեռք բերվել ստորագրել Փոխըմբռնման հուշագիր, որում կնշվեն համագործակցության ուղղությունները, իրականացվելիք ծրագրերը և ժամկետները: Պայմանավորվածություն է ձեռք բերվել նաև հատուկ ուշադրություն դարձնել Զինված հակամարտություններին երեխաների մասնակցության մասին կամընտիր արձանագրության դրույթների իրազեկվածության բարձրացմանը:

Նույն օրը Դավիթ Տոնոյանն ընդունել է նաև ՄԱԿ-ի բնակչության հիմնադրամի (UNFPA) հայկական գրասենյակի ղեկավար Գարիկ Հայրապետյանին: Ամփոփվել են համագործակցության իրականացման շուրջ նախօրոք ձեռք բերված համաձայնությունները: Հստակեցվել են ռազմաբժշկական ծառայությանը վերարտադրողական առողջության վերաբերյալ իրազեկվածության բարձրացման և զինված ուժերում կանանց իրավունքների երաշխավորման և պաշտպանության ծրագրերի իրականացման ձևաչափերն ու ժամկետները: Քննարկվել են համագործակցության ծավալների ու ուղղությունների ընդլայնման հնարավորությունները: