Սեյրան Օհանյանը վարչապետի պաշտոնը զբաղեցնելու առաջարկ չի ստացել

Հայաստանի Հանրապետության պաշտպանության նախարարի պաշտոնակատար Սեյրան Օհանյանը վարչապետի թափուր պաշտոնը զբաղեցնելու առաջարկ չի ստացել: Այս մասին Սեյրան Օհանյանը տեղեկացրեց Ծաղկաձորում անցկացվող համաժողովի ժամանակ: «Ինձ համար մեծ պատիվ է, և ես հպարտ եմ, որ որոշակի դերակատարում եմ ունեցել, և իմ անունն այսօր շրջանառվում է վարչապետի պաշտոնը զբաղեցնելու հավակնորդների թվում: Սակայն պետք է ասեմ, որ պաշտպանության նախարարը մեր երկրի անվտանգության ապահովման գործում շատ կարևոր նշանակություն ունի: Ես՝ որպես պաշտպանության նախարար, դեռևս շատ անելիքներ ունեմ մեր երկրի անվտանգությունն ու պաշտպանողականությունն ապահովելու գործում»,- «Արմենպրես»-ի հաղորդմամբ՝ նշեց Օհանյանը:

Նա նշեց, որ Տիգրան Սարգսյանի հետ համատեղ երկար տարիներ համագործակցված աշխատանք է եղել, որի դրական արդյունքները նկատելի են: Օհանյանի խոսքով՝ յուրաքանչյուրի իրավունքն է վերլուծել իր աշխատանքը և հասկանալ՝ կարող է շարունակել իր աշխատանքը:

Անդրադառնալով նոր կառավարության ձևավորմանը և դիտարկմանը, թե կշարունակի՞ ինքը պաշտոնավարել, թե ոչ՝ Սեյրան Օհանյանը նշեց, որ եթե ինքը մնա կառավարության մեջ, կշարունակի իր հայրենանվեր աշխատանքը, չմնա՝ իր տեղը հասարակության մեջ անձամբ կգտնի: