Ռուանդան հարգում է ցեղասպանության զոհերի հիշատակը

Ռուանդան ապրիլի 7-ին նշում է XX դարի վերջի ամենաահավոր ցեղասպանության 20-րդ տարելիցը, երբ խուտու և թութսի ազգությունների մեջև դիմակայության հարյուր օրվա ընթացքում, ըստ տարբեր գնահատումների՝ գազանաբար ոչնչացվեց 800 հազարից մինչև մեկ միլիոն մարդ: Հիմնականում զոհվել են թութսի էթնիկ փոքրամասնության ներկայացուցիչները: Այս մասին հայտնում է itar-tass-ը:

2004 թվականից ապրիլի 7-ը ՄԱԿ-ի որոշմամբ նշվում է որպես Ռուանդայում ցեղասպանության հիշատակի միջազգային օր:

Ռուանդայի գործերով միջազգային տրիբունալը դատել է ցեղասպանության կազմակերպիչներին և ոգեշնչողներին: Ռուանդայի բանակի գնդապետ Տեոնեստե Բագոսորուն, որն ամբողջովին զավթել էր վերահսկողությունը երկրի քաղաքական և ռազմական իրադրության նկատմամբ, դատապարտվել է ցմահ բանտարկության: Ռուանդայի զինված ուժերի գեներալ Օգյուստեն Բիզիմունգուն ստացել է երեսուն տարվա բանտարկություն: Պատիժ են կրել նաև բռնության կոչ անող լրագրողները:

Ռուանդայի մայրաքաղաք Կիգալիում Ցեղասպանության հուշակենտրոնի տնօրենը, հուշակենտրոն, որտեղ թաղված են 250 հազար զոհեր, անհրաժեշտ է համարում ողբերգության հիշատակի պահպանումը՝ դրա կրկնում թույլ չտալու համար: «Մի ամբողջ սերունդ է մեղավոր 1994 թվականին Ռուանդայում կատարված հանցագործություններում: 50 տարի հետո կգա մի այլ սերունդ, որը պարտավոր է իմանալ, թե ինչ է տեղի ունեցել ծնողների, պապերի, հանցագործների և նրանց հետ, ովքեր վերապրել են այդ մղձավանջը»,- ասել է Օնորե Գատերան:

Ցեղասպանության 20-րդ տարելիցին նվիրված արարողությանը մասնակցելու համար Ռուանդա է ժամանել ՄԱԿ-ի գլխավոր քարտուղար Պան Գի Մունը: Ֆրանսիան հրաժարվել է մասնակցել արարողությանն այն բանից հետո, երբ Ռուանդայի նախագահ Պոլ Կագամեն վերջինիս մեղադրել է «ցեղասպանության քաղաքական նախապատրաստման» մեջ: