Հայ արիները կանանց և աղջիկներին շնորհավորել են Մայրության և գեղեցկության տոնի առթիվ

Հայ արիական միաբանությունը և Հայ ազգայնականների համախմբումը շնորհավորական ուղերձ են հղել Մայրության և գեղեցկության տոնի կապակցությամբ: Ուղերձում, մասնավորապես, ասված է.

«Ավարտվեց պաշտոնական տոնի մեկամսյակը, սակայն հայ տղամարդու համար տարվա յուրաքանչյուր օրը եղե՛լ ու մնու՛մ է մայրության, ընտանիքի ու կնոջ կամ հարազատ քրոջ փառաբանման ու նվիրական սիրո օր: Հայ ընտանիքի սյունն է հայ մայրը, ով ոչ միայն կինն է ու տիեզերական կեսն իր ամուսնու, այլև՝ օջախի ծուխն ու ցեղի շարունակականության պահպանման երաշխավորն է:

Հայ իգական սեռը ի բնե հավասար, որպես (հոգե-մարմնական) ԿԵՍ է արարվել Հայ արական սեռին, և ԱրԷգԱկ-ի (Ար-ական ու Իգ(Էգ)-ական Ակունքի) ծինաբանական ընթացքը հայ տեսակի ու հավատի մեջ ամրագրված է հենց արարչության սկզբից… Հայ տեսակն ունի և՛ Աստվածներ և՛ Աստվածուհիներ:

Հայուհին պե՛տք է դառնա ինչպես իր ընտանիքի, օջախի ամուր սյունը, այնպես էլ բոլորիս տան՝ մեծ տան՝ Հայոց հայրենիքի հաստատուն հենասյունը: «Մայրերի ափերի մեջ պիտի փնտրել ազգի փրկությունը»,- ասել է Աստվածամարդ Նժդեհը, և հայ մայրն ի՛ր նվիրումով ու պտղաբերությամբ, հայ կինն ի՛ր սիրով ու աշխատասիրությամբ շարունակում են ազգի շառավիղը:

Եվ թող հայ կինը նախ և առաջ վերագտնի իրեն որպես կի՛ն՝ իգական արմատ և ակունք, որը սնվում է փոխադարձ սիրո ու նվիրումի պտուղներով: Քանզի միայն լիարժեք սիրված ու կյանքում կայացած կին տեսակն է սխրանք գործում հանուն անձնական և ընդհանրական ու ազգային նպատակների: Թող Հայ Աստվածները լինեն պահապանն ու ապավենը հայոց իգական շառավիղի:

Հայ կանանց մաղթում ենք Աստվածամայր Անահիտի օրհնությամբ արժանանալ մայրանալու և պտղաբերումի զգացումին, Նանե Աստվածուհու օրհնությամբ զգալ տիեզերահաս ողջախոհության կատարելությանը, Աստղիկ Աստվածուհու օրհնությամբ հասնել մեծ սիրո և այդ սիրո ջերմությունը վայելելու քնքշանքին: Եվ թող հայ արական ակունքը դառնա ապավենն այս մաղթանքների, քանզի հայ կինը ինչպես նախկինում, այսօր էլ հայ տղամարդու զորության սնուցողն է և սիրո ու նվիրումի մարմնացումը՝ հանուն այր ու կին բնակարգի կայացման, զավակների ու օջախների շենացման, հայի գոյության և առաքելության հաղթանակի, Հայքի ամբողջականացման ու հզորացման»: