Արսեն Ջուլֆալակյանը դժգոհ է Եվրոպայի առաջնությունում մրցավարների կատարած աշխատանքից

Հունահռոմեական ոճի ըմբշամարտի Օլիմպիական խաղերի և Եվրոպայի առաջնության արծաթե մեդալակիր Արսեն Ջուլֆալակյանն իր դժգությունն է հայտնել Եվրոպայի առաջնության ընթացքում մրցավարիների կողմնապահությունից: Ջուլֆալակյանը Facebook-ի իր պաշտոնական էջում գրել է.

«Եթե մեր պատկան մարմինները շարունակեն իրենց որդեգրած գիծը, շատ հնարավոր է, հաճախ, ամենաորոշիչ պահերին նման կորուստներ ունենանք... Քանի դեռ մրցավարը չի տեսնում, չի զգում, որ տվյալ մարզիկի թիկունքին մի ամբողջ պետություն է կանգնած, չունի ոչ մի մտավախություն պատժված լինելու, կգործի այնպես, ինչպես իրեն կթելադրեն, կամ ինչպես ինքն առավել շահեկան կհամարի։ Վստահ եմ, ոչ մեկը հետևողականորեն չի պահանջելու Կարեն Ասլանյանի (59 կգ) և իմ գոտեմարտը դատող մրցավարների պատիժը որակազրկման տեսքով։ Ամեն ինչ կավարտվի մամուլի շրջանակում քննարկմամբ և քննադատմամբ։ Իսկ դա բոլորս ենք հասկանում, որ առնվազն ո չ արդյունավետ է։ Նման հարթակներում միայն ուժով պայքարելը շատ քիչ է՝ այն էլ մեր երկրի համար: Այսօր նույն Ռուսաստանը, Թուրքիան, Ադրբեջանը, Բուլղարիան, Հունգարիան այնքան են հզորացրել մրցավարական և ՖԻԼԱ-ի ղեկավար կազմում իրենց ունեցած դիրքերը, որ ցանկացած հավասար գոտեմարտ ի զորու են իրենց ուզածով ավարտել»։

Ըմբիշը շեշտել է նաև այն փաստը, որ իր եզրափակիչ գոտեմարտը դատում էր այն նույն մրցավարը, ով ջանասիրաբար «օգնել է» Արթուր Ալեքսանյանին՝ աշխարհի առաջնության ոսկին նվիրելու ռուս մարզիկին։

Հայաստանի ազատ և հունահռոմեական ոճի ըմբիշները նվաճել են 5 մեդալ Ֆինլանդիայի Վանտաա քաղաքում ավարտված ըմբշամարտի Եվրոպայի առաջնությունում: Հունահռոմեական ոճի ըմբիշներ 96 կգ քաշային Արթուր Ալեքսանյանը և 75 կգ քաշային Արսեն Ջուլֆալակյանը նվաճել են ոսկե և արծաթե մեդալներ: Ի դեպ, Ալեքսանյանը պաշտպանել է իր տիտղոսը' որևէ միավոր չզիջելով մրցակիցներին և երրորդ անգամ անընդմեջ դարձել Եվրոպայի չեմպիոն: Ազատ ոճայիններից 71կգ քաշային Գրիգոր Գրիգորյանը դարձել է փոխչեմպիոն, իսկ 57 կգ քաշային Գարիկ Բարսեղյանը և 86 կգ քաշային Մուսա Մուրթազալիևը նվաճել են բրոնզե պարգևներ: