Ուկրաինան Մոսկվայից բացատրություններ է սպասում Արևելքում տեղի ունեցող իրադարձությունների վերաբերյալ

Ուկրաինան ռուսական կողմից բացատրություններ է սպասում Լուգանսկում, Խարկովում եւ Դոնեցկում տեղի ունեցած վերջին իրադարձությունների վերաբերյալ: Այս մասին հայտնոփւմ է «Ուկրինֆորմը»:

Այդ մասին ապրիլի 7-ին Կիևում կայացած ճեպազրույցում հայտարարել է Ուկրաինայի արտաքին գործերի նախարարի պաշտոնակատար Անդրեյ Դեշչիցան:

«Մենք մեծ նշանակություն ենք տալիս այն իրադրությանը, որն այժմ ստեղծվել է Դոնեցկում, Խարկովում եւ Լուգանսկում… Մենք մեր կողմից սպասում ենք ռուսական կողմի հնարավոր բացատրություններին»,-նշել է նա:

Անդրեյ Դեշչիցան հիշեցրել է, որ առաջին փոխվարչապետը, Ուկրաինայի անվտանգության խորհրդի նախագահը, ներքին գործերի նախարարը եւ այլ պաշտոնատարներ մեկնել են այդ տարածաշրջաններ: Ներկայում անհրաժեշտ աշխատանք է կատարվում իրադրությունը նորմալացնելու համար:

Իր հերթին Եվրամիությունն անհանգստություն է հայտնել Ուկրաինայի առավելապես ռուսալեզու երեք տարածաշրջանների իրադրության կապակցությամբ: Ինչպես հայտարարել է Եվրամիության արտաքին գործերի եւ անվտանգության քաղաքականության գերագույն ներկայացուցիչ Քեթրին Էշթոնի մամուլի քարտուղար Մայա Կոսյանչիչը, Բրյուսելն ուշադիր և անհանգստությամբ է հետևում իրադրության զարգացմանը:

Դրա հետ մեկտեղ Կոսյանչիչը նշել է, որ «քաղաքական բոլոր պահանջներն Ուկրաինայում պետք է իրականացվեն ոչ բռնի մեթոդներով և ժողովրդավարական չափորոշիչներին ու օրենքներին համապատասխան», և այդ առումով Ուկրաինայի առաջիկա նախագահական ընտրությունները «դրա համար լավ ֆորում են»:

«Մենք վճռականորեն պաշտպանում ենք Ուկրաինայի ինքնիշխանությունը եւ տարածքային ամբողջականությունը, և այդ առումով պաշտպանում ենք Ուկրաինայի կառավարությանը: Մենք կշարունակենք ճգնաժամի ապաէսկալացման և երկրի իրադրության հետագա ապակայունացումից խուսափելու կոչ անել»,-ասել է Քեթրին Էշթոնի ներկայացուցիչը: