Կլինի Ռուսաստանի վստահված անձը

Անցած հինգշաբթի ՀՀԿ ԳՄ նիստի ժամանակ հայտնի դարձավ, որ վարչապետը հրաժարականի դիմում է ներկայացրել: Ինչպես ինքը՝ նախկին վարչապետ Տիգրան Սարգսյանն ասաց, նա այդ դիմումը ներկայացրել էր դեռևս մեկ ամիս առաջ, սակայն այն հետաձգվել էր` մի շարք կարևոր պետական միջոցառումների և ՀՀԿ տնտեսական համաժողովի անցկացման անհրաժեշտությունից ելնելով:

Այժմ վարչապետի հնարավոր թեկնածուի վերաբերյալ յուրաքանչյուրն անում է իր կանխատեսումները, շոշափվում են բազմաթիվ անուններ՝ Հովիկ Աբրահամյան, Սեյրան Օհանյան, Արթուր Բաղդասարյան և այլն:

Լուրեր.com-ի հետ զրույցում քաղաքական և ընտրական տեխնոլոգիաների փորձագետ Արմեն Բադալյանը նշեց, որ այս պահին անուններ հնչեցնելը կլինի միայն գուշակություն:

«ՀՀ նոր վարչապետ կդառնա այն անձը, ով վստահություն կունենա Ռուսաստանում, ինչո՞ւ, որովհետև այստեղ մի քանի հարցեր պետք է պարզել: Նախ, թե վարչապետի նոր նշանակված անձը լինելու է ընդամենը ժամանակավո՞ր վարչապետ մինչև մյուս նախագահական ընտրություններ, թե՞ լինելու է վարչապետ-նախագահի թեկնածու, թե՞ վարչապետ երկար ժամանակով, այսինքն` կախված այդ սկզբունքներից: Սակայն չենք կարող նշել, թե այդ սկզբունքներից որը կլինի, որովհետև, փաստորեն, մի բան կարող ենք ասել, որ վարչապետի հրաժարականի հարցը հայաստանյան գործոններով այս պահի դրությամբ հնարավոր չէ մեկնաբանել: Հաշվի առնելով այն հանգամանքը, որ սեպտեմբերի 2-ից հետո Հայաստանը փաստացի դարձել է Ռուսաստանի Դաշնության վարչատարածքային միավոր` բնականաբար, այդ հանգամանքներում շատ ավելի տրամաբանական է վարչապետի հրաժարականը բացատրել արտաքին քաղաքական գործոններով: Իսկ թե հիմա այդ արտաքին քաղաքական գործոններն ի՞նչ նպատակ են իրենց առջև դրել, վարչապետի ինչպիսի՞ որակական թեկնածու են ուզում, ապագան ցույց կտա»,-ասաց Բադալյանը:

Հարցին, թե հրաժարականի հարցը վաղո՞ւց էր որոշված, թե՞ անակնկալ էր, Արմեն Բադալյանն ասաց. «Հայաստանը փոքր երկիր է, եթե վարչապետը մեկ ամիս առաջ հրաժարականի դիմում ներկայացրած լիներ` ամենայն հավանականությամբ այդ մասին արտահոսք, այսպես թե այնպես, կլիներ: Սակայն մենք գիտենք, որ դրա մասին արտահոսք ընդհանրապես չի եղել և, ինչպես ասում են, անակնկալ միանգամից հայտարարվեց վարչապետի հրաժարականի մասին. ամենայն հավանակությամբ, դա շատ կարճ ժամանակահատվածում ընդունված որոշում է եղել»: