ՀՅԴ-ն կհամաձայնի ընդգրկվել նոր կառավարությունում, եթե ընդունվի քառյակի այլընտրանքային ծրագիրը

ՀՅ Դաշնակցությունը կլինի այն կառավարության կողքին, որն իր ծրագիրը կկառուցի դեռևս նախորդ նախագահական ընտրություններին կուսակցության կողմից առաջարկված յոթ կետերի շուրջ: Այս մասին Ազգային ժողովում լրագրողների հետ զրույցում ասաց ՀՅԴ խմբակցության ղեկավար Արմեն Ռուստամյանը: Նրա խոսքով' այս պահին ոչ իշխանական քառյակի մյուս ուժերի հետ քննարկումների մեջ են, որտեղ հիմնական հարցը նոր կառավարությանն առաջարկվելիք այլընտրանքային ծրագիրն է, որն իրենք բավականին երկար ժամանակ է' մշակում են: «Ես կարծում եմ, որ կառավարությանն անվստահություն հայտնելու քառյակի նախաձեռնությունն ամբողջական բնույթ ուներ, այն չէր վերաբերում միայն կառավարության կազմի փոփոխությանը, այն վերաբերում էր ծրագրի փոփոխությանը: Վարչապետի հրաժարականը նաև կառավարության կազմի փոփոխության հնարավորությունն է դարձրել իրական: Մենք դրանք իրարից չպետք է անջատենք, ամբողջական փոփոխության խնդիրը, որ մենք դրել ենք' թե կազմի հեռացում, թե նաև քաղաքականության փոփոխություն, նորից մնում է ուժի մեջ»: Այժմ պետք է աշխատենք, որ այն ծրագիրը, ինչի վրա մյուս ուժերի հետ աշխատում ենք, դառնա գլխավոր խնդիրը»,-ասաց Արմեն Ռուստամյանը' հավելելով, որ այս պահին այդ հարցով դեռևս ոչ մի հանդիպում չի եղել խորհրդարանական մեծամասնության և երկրի նախագահի հետ: «Ստեղծվել է մի իրավիճակ, որ տասնօրյա ժամկետում պետք է նշանակվի վարչապետ, բայց վարչապետի անձը, կառավարության կազմը չեն կարևոր մեզ համար, այլ մեր կողմից առաջարկվող ծրագրի ընդունումը: Այս պարագայում ծրագիրը դառնում է նաև միակ հնարավոր տարբերակը երկխոսելու, համագործակցելու, համատեղ քայլեր անելու»,-նշեց պատգամավորը:

Արմեն Ռուստամյանի խոսքով' չնայած իրենք քառյակով չեն քննարկել կառավարության կազմում հայտնվելու հարցը, բայց այն պարագայում, երբ կընդունվի իրենց կողմից ներկայացվող ծրագիրը, անհասկանալի կլինի դա իրագործելու առաջարկից հրաժարումը: «Եթե մեր մոտեցումներն ընդունվեն, մենք ամեն տեղ էլ պատրաստ կլինենք մտնել ու ստանձնել պարտավորություններ: Անհասկանալի կլինի, երբ դու ասում ես' այս ծրագիրը ճիշտ է, ասում են' արի այդ ծրագիրն իրականացրու, եթե մերժում ես, երկու եզրակացություն կարելի է անել դրանից' կամ ներկայացրած ծրագիրդ է թերի, կամ դու ինքդ այն պրո ֆեսիոնալ մակարդակը չունես, որ ասածն իրագործես»,-եզրափակեց Արմեն Ռուստամյանը:

Ապրիլի 4-ին ոչ իշխանական չորս ուժերը' «Ժառանգություն», ՀՅԴ, ՀԱԿ և ԲՀԿ, հանդիպում ունեցան «Ժառանգություն» խմբակցությունում, որի ժամանակ քննարկեցին հետագա անելիքների հարցը: Նմանատիպ հանդիպումներ առաջիկայում ևս նախատեսվում են, քանի որ ուժերը համաձայնության են եկել շարունակել միասնական գործողությունները:

Ապրիլի 3-ին ՀՀԿ ԳՄ նիստի ժամանակ ՀՀԿ գործադիր մարմինն ընդունել է ՀՀ վարչապետ Տիգրան Սարգսյանի հրաժարականի դիմումը: Նույն օրը երկրի ղեկավարը հրամանագիր է ստորագրել, որով ընդունել է կառավարության հրաժարականը եւ որոշել, որ կառավարության անդամները պետք է շարունակեն պարտականությունների կատարումը մինչև նոր կառավարության կազմավորումը:

ԶԼՄ-ներում ապրիլի 7-ին տեղեկություն հայտնվեց, ըստ որի' ՀՅԴ-ն բանակցում է նախարարական պորտֆելների շուրջ: