«Հրապարակ». Երկրի շահերից է բխում կոալիցիոն կառավարության ձևավորումը

Նոր կառավարության ձեւավորման խնդիրն այս օրերին զբաղեցրել է բոլորի մտքերն ու կաթվածահար արել երկրի կառավարումը: Բոլորը քննարկում են, թե ով կլինի վարչապետը, ովքեր կընդգրկվեն նորընտիր կառավարության կազմում: Սակայն, եթե վերանանք անձերից, նոր կառավարության ձեւավորման հետ կապված մեկ ցանկություն կարելի է բարձրաձայնել: Գրում է «Հրապարակ»-ը:

Սա այն եզակի իրավիճակներից է, երբ երկրի շահերից է բխում կոալիցիոն կառավարության ձեւավորումը (այն կոչենք Ազգային համաձայնության կառավարություն): Այս պարագայում մի քանի տարի անց մենք թերեւս կունենանք երկու շատ հավանական ելք՝ կամ երկրի վիճակը կլավանա, եւ մեր պետությունը դուրս կգա այս փակուղուց, կամ այսօր գործող ուժերը կձախողվեն եւ խմբով կհեռանան քաղաքական ասպարեզից:

Երկու դեպքում էլ կշահի երկիրը, կշահի հայ ժողովուրդը: Հակառակ պարագայում մենք կունենանք նոր վարչապետ ու կառավարություն, որոնց հաջողելու հավանականությունը շատ փոքր կլինի, իսկ մեր բոլորիս ապագան՝ մշուշոտ: Գործող իշխանությունը կշարունակի պնդել, որ ընդդիմությունն իրեն խանգարում է աշխատել, ընդդիմությունը կշարունակի զբաղեցնել քաղաքական դաշտը եւ լավագույն դեպքում երկիրը «փրկելու» հնարավորություն կունենա 3 տարի անց: Դրան կհաջորդի եւս մի 3-5-10 տարի, մինչեւ այս ուժերը եւս ձախողվեն եւ հեռանան ասպարեզից՝ իրենց տեղը զիջելով նոր, երիտասարդ, չվարկաբեկված անձանց:

Իսկ դա կնշանակի, որ մենք անորոշ ժամանակով կհետաձգենք սերնդափոխությունը մեր երկրում: Հնարավորություն կտանք, որ մեզ նորից ու անորոշ ժամանակով խաբեն, մոլորեցնեն: Իսկ մենք «անապատում դեգերելու» ժամանակ չունենք՝ ժամանակը սուղ է, փոփոխությունների անհրաժեշտությունը՝ հրատապ, ուստի մեր փրկության միակ հույսը կոալիցիոն կառավարության ձեւավորումն է:

Շարունակությունը` «Հրապարակ» օրաթերթի այսօրվա համարում: