Քեսաբի դեպքերն անպատժելիության հետևանք են. Հայկ Դեմոյան

Ներկայիս համաշխարհային քաղաքականությունը, եվրոպական դիվանագիտությունը հիմքեր են ստեղծում, որպեսզի ապագայում էլ կրկնվի այն, ինչ տեղի է ունենում Քեսաբում: Ապրիլի 8-ին Երևան-Մոսկվա տեսակամուրջի ընթացքում այսպիսի կարծիք հայտնեց Ցեղասպանության թանգարան-ինստիտուտի տնօրեն Հայկ Դեմոյանը: «Այն, ինչ տեղի է ունեում Քեսաբում, հետևանքն է նրա, որ Հայոց ցեղասպանության համար Թուրքիան շարունակում է անպատիժ մնալ, հետևանքն է համաշխարհային քաղաքականության երկակի և եռակի ստանդարտների»,- նշեց Դեմոյանը:

Նրա խոսքով` այսօր Քեսաբն է, վաղը կլինի մեկ ուրիշը, իսկ դա կարող է լինել ոչ թե ընդամենը մեկ գյուղ, այլ մի ամբողջ երկիր: «Ցավոք, 21-րդ դարի սկզբում մարդկությունը դեռևս անկարող է վերջ դնել ամենասարսափելի հանցագործությանը՝ մարդկանց ոչնչացմանը և բռնի տեղահանությանը միայն օտար լինելու պատճառով»,- նշեց Դեմոյանը:

Դեմոյանն ասաց, որ ներկայիս համաշխարհային քաղաքականության արդյունքում կարող են բազմաթիվ քեսաբներ լինել:

Թուրք-սիրիական սահմանի մերձակայքում և Լաթաքիայի հյուսիսում գտնվող Քեսաբ գյուղաքաղաքի վրա հարձակումն սկսվել է մարտի 21-ին Թուրքիայի սահմանի ութ կետերից: Տեղեկություններ են հաղորդվել, որ հարձակումն իրականացրել են «Ջաբհա ան Նուսրա» և «Ջեյշ ալ Իսլամ» խմբավորումները: Գյուղաքաղաքում գրեթե բնակիչներ չեն մնացել, նրանք տեղափոխվել են առավել ապահով վայրեր: Հայերի մեծամասնությունը ապաստան է գտել Լաթաքիայի Սուրբ Աստվածածին եկեղեցու տարածքի մոտ գտնվող ազգային կառույցներում: Տեղի Հայկական շտապ օգնության մարմինը Սիրիայի Կարմիր մահիկի կազմակերպության հետ բնակիչներին ապահովել է անհրաժեշտ պարագաներով և սննդով: Քեսաբում մնացած փոքրաթիվ հայերի ճակատագրի վերաբերյալ լուրերը հակասական են: Իրադարձությունների վրա աշխարհի ուշադրությունն է հրավիրել ՀՀ նախագահ Սերժ Սարգսյանը' Հաագայում, Միջուկային անվտանգության միջազգային գագաթնաժողովի ժամանակ ելույթ ունենալով մամուլի համար: Հայ պատգամավորների խումբն էլ այցելել էր Սիրիա' տեղում ծանոթանալու մեր հայրենակիցների ճակատագրին: Նրանց ընդունել է Սիրիայի նախագահ Բաշար ալ Ասադը: