«Հայաստանն այժմ ոչ թե փրկարարական ուժեր ներմուծող, այլ արտահանող երկիր է». Մովսես Պողոսյան

Ի տարբերություն 1988 թվականի Սպիտակի աղետալի երկրաշարժի` այժմ հայաստանյան իշխանությունները իրականացնում են անհրաժեշտ միջոցառումներ` աղետներին հնարավորինս դիմակայելու համար: Ապրիլի 8-ին հրավիրված ասուլիսում ԱԻՆ Ճգնաժամային կառավարման պետական ակադեմիայի ռեկտոր Համլետ Մաթևոսյանը, պատասխանելով լրագրողների այն հարցին, թե որքանով է Հայաստանը պատրաստ աղետներին դիմակայելուն, նշեց, որ 100-տոկոսնանոց պատրաստվածություն չկա աշխարհի և ոչ մի` այդ թվում` ԱՄՆ-ի նման զարգացած երկրներում:

«Այժմ կարելի է ասել, որ մենք 50 տոկոսով մոտենում ենք աղետներին դիմակայելու անհրաժեշտ ցուցանիշին»,- հավաստիացրեց Մաթևոսյանը` ընդգծելով, որ հեշտ է մշտապես աղետների ռիսկի նվազեցման պահանջը դնել միայն պետության ուսերին, մինչդեռ անհրաժեշտ է, որ յուրաքանչյուր քաղաքացի տիրապետի առաջին օգնություն հասցնելու տարրական կանոններին, որոնցից է հաճախ կախված հետևանքների չեզոքացումը:

Նա շեշտեց, որ պետության կողմից համապատասխան աշխատանքներ են տարվում աղետների ռիսկի նվազեցման բոլոր ուղղություններով:

«Մենք 1988 թվականին չունեինք փրկարարական ուժեր, այլ հանդիսանում էինք այսպես ասած փրկարարներ ներմուծող երկիր, իսկ հիմա մենք նաև արտահանող երկիր ենք»,- կարծիք հայտնեց Աղետների ռիսկի նվազեցման ազգային պլատֆորմի տնօրեն Մովսես Պողոսյանը ' հավելելով, որ այսօր հայկական փրկարարական ուժերը հաջողությամբ համագործակցում են միջազգային փրկարարական կառույցների հետ աղետների հետևանքների նվազեցման գործընթացներում:

Բանախոսներն ընգծեցին, որ աղետների ռիսկի կանխարգելման գործում պետք է ներգրավված լինեն հասարակության բոլոր շերտերը, այդ թվում' երեխաները: Այս ուղղությամբ ևս ԱԻՆ-ը աշխատանքներ է տանում' իրականացնելով իրազեկման դասընթաներ, սեմինարներ հասարակության իրազեկվածության մակարդակի բարձրացման ուղղությամբ:

Աղետների ռիսկի նվազեցման համաշխարհային զարգացումներում Հայաստանը լուրջ ներդրում ունի, ինչի մասին է վկայում նաև ապրիլի 1-3-ը Ղազախստանի Ալմա Աթա քաղաքում կայացած տարածաշրջանային խորհրդաժողովին մեր երկրի մասնակցությունը: Միջոցառման շրջանակում մասնակիցներին ներկայացվել են աղետների ռիսկի նվազեցման գործում մեր երկրի ունեցած ձեռքբերումները: