Ռաֆայել Զինուրովը Արևմուտքին կոչ է անում ուշադրությունը սևեռել Քեսաբի վրա

Արևմուտքը շարունակում է լուռ հետևել Քեսաբի իրադարձություններին: Այս մասին Երևան-Մոսկվա տեսակամուրջի ընթացքում ասաց «Եդինայա Ռոսիա» կուսակցության անդամ, Բաշկիրիայի Ազգային ժողովի նախագահի տեղակալ Ռաֆայել Զինուրովը: «20-րդ դարում Հայոց ցեղասպանությունն իրականացվեց Արևմուտքի լուռ համաձայնությամբ: Հիմա Քեսաբի հարցում Արևմուտքը կրկին լուռ է»,- ասաց նա:

Զինուրովն ընդգծեց, որ այս պահին Արևմուտքի ուշադրությունը սևեռված է Ուկրաինայի վրա, իսկ միջազգային կառույցները փորձում են տպավորություն ստեղծել, թե Քեսաբի դեպքերը լոկալ բնույթ են կրում:

«Ես կարծում եմ, որ Արևմուտքն այս պահին ուշադրություն պետք է դարձնի ոչ թե Ուկրաինայի, այլ Քեսաբի վրա»,- նշեց Զինուրովը:

Թուրք-սիրիական սահմանի մերձակայքում և Լաթաքիայի հյուսիսում գտնվող Քեսաբ գյուղաքաղաքի վրա հարձակումն սկսվել է մարտի 21-ին, Թուրքիայի սահմանի մի քանի կետերից: Տեղեկություններ են հաղորդվել, որ հարձակումն իրականացրել են «Ջաբհա ան Նուսրաե և «Ջեյշալ Իսլամ» խմբավորումները: Գյուղաքաղաքում գրեթե բնակիչներ չեն մնացել, նրանք տեղափոխվել են առավել ապահով վայրեր:

Հայերի մեծամասնությունը ապաստան է գտել Լաթաքիայի Սուրբ Աստվածածին եկեղեցու տարածքի մոտ գտնվող ազգային կառույցներում: Տեղի Հայկական շտապօգնության մարմինը Սիրիայի Կարմիր մահի կի կազմակերպության հետբնակիչներին ապահովել է անհրաժեշտ պարագաներով և սննդով: Քեսաբում մնացած փոքրաթիվ հայերի ճակատագրի վերաբերյալ հայտարարությունները հակասական են: Իրադարձությունների վրա աշխարհի ուշադրությունն է հրավիրել ՀՀ նախագահ Սերժ Սարգսյանը' Հաագայում, Միջուկային անվտանգության միջազգային գագաթնաժողովի ժամանակ ելույթ ունենալով մամուլի համար: Հայ պատգամավորների խումբն էլ այցելել էր Սիրիա' տեղում ծանոթանալու մեր հայրենակիցների ճակատագրին: Նրանց ընդունել է Սիրիայի Նախագահ Բաշար ալ Ասադը: