Ոչ իշխանական քառյակը սպասման մեջ է ու կառավարության մաս կազմելու հարցում միասնական դիրքորոշում չունի

Մինչ հասարակությունն ակտիվ քննարկում է նոր վարչապետի թեկնածուի և հնարավոր կոալիցիոն կառավարության ձևավորման հարցը, Ազգային ժողովի ոչ իշխանական քառյակը (ԲՀԿ, ՀՅԴ, ՀԱԿ, «Ժառանգություն») սպասողական վիճակում է: Նրանք այդ հարցերում միասնական դիրքորոշում չունեն, որոշ ուժեր նույնիսկ կուսակցության ներսում չեն որոշել սեփական անելիքները: «Արմենպրես»-ի հետ զրույցում ԱԺ «Ժառանգություն» խմբակցության ղեկավար Ռուբեն Հակոբյանը նշեց, որ իրենք դեռևս խորհրդակցության առաջարկ երկրի Նախագահից չեն ստացել: Հարցին, թե «Ժառանգությունը» պատրա՞ստ է մեծամասնության հետ կոալիցիա կազմել, եթե ընդունվեն իրենց պայմանները՝ Ռուբեն Հակոբյանը նշեց, որ այդ հարցն իրենք չեն քննարկել: «Մեր օրակարգում այդպիսի հարց չկա»,- ասաց նա: Ապրիլի 7-ին տարածած հայտարարության մեջ «Ժառանգություն» կուսակցությունը քառյակի համագործակցության անհրաժեշտ պայման է համարել ընդդիմադիր ներխորհրդարանական համագործակցության ձևաչափի միջկուսակցական միասնական ճակատի վերափոխումը:

Հայտարարության մեջ նշված էր, որ այժմ առաջնային է դարձել չորս քաղաքական ուժերի օրակարգում մինչ օրս տեղ գտած, սակայն ինչ-ինչ պատճառներով չիրականացված կուսակցությունների ղեկավարների հանդիպումը, որի ընթացքում առաջին դեմքերի մակարդակով պայմանավորվածություն ձեռք կբերվի հետագա քայլերի մարտավարության և համատեղ պայքարի ռազմավարության վերաբերյալ: Ի դեպ, ապրիլի 7-ի հայտարարությունից հետո էլ եռյակը «Ժառանգության» կոչին չի արձագանքել:

ԱԺ ՀԱԿ խմբակցության ղեկավար Լևոն Զուրաբյանն էլ գործակալության հետ զրույցում տեղեկացրեց, որ իրենք էլ Նախագահից խորհրդակցությունների անցկացման հրավեր չեն ստացել: Զուրաբյանը հրաժարվեց մեկնաբանելուց այն հանգամանքը, որ ՀՅԴ-ն ու ԲՀԿ-ն չեն բացառել իշխող կոալիցիային միանալը՝ ընդգծելով, որ ինքն այդ մասին տեղյակ չէ: Իսկ հարցին՝ ՀԱԿ-ը կոալիցիային միանալու տարբերակ դիտարկո՞ւմ է, նա խորհուրդ տվեց կարդալ ՀԱԿԿ առաջնորդ Լևոն Տեր-Պետրոսյանի ելույթը մարտի 1-ի հանրահավաքի ժամանակ:

Հիշեցնենք, որ ՀԱԿԿ առաջնորդ Լևոն Տեր-Պետրոսյանը մարտիմեկյան հանրահավաքում հարկ էր համարել հայտարարել, որ Կոնգրեսը ոչ մի պարագայում մտադիր չէ մաս կազմել Սերժ Սարգսյանի ձևավորած որևէ կառավարության' անկախ այն բանից, թե ինչպիսի պաշտոններ կառաջարկվեն:

ՀՅԴ խորհրդարանական խմբակցության քարտուղար Աղվան Վարդանյանը տեղեկացրեց, որ ՀՅԴ-ն նույնպես խորհրդակցության հրավեր չի ստացել՝ դժվարանալով պատասխանել հարցին, թե երբ կլինի հրավերը: «Այս պահին Նախագահը Հայաստանում չէ: Չեմ կարող ասել, թե երբ կլինի»,- ասաց Վարդանյանը: ԱԺ ՀՅԴ խմբակցության ղեկավար Արմեն Ռուստամյանը լրագրողների հետ զրույցում նշել է, որ Դաշնակցությունը կլինի այն կառավարության կողքին, որն իր ծրագիրը կկառուցի դեռևս նախորդ նախագահական ընտրություններին կուսակցության կողմից առաջարկված յոթ կետերի շուրջ:

Արմեն Ռուստամյանի խոսքով' չնայած իրենք քառյակով չեն քննարկել իշխող կոալիցիայում հայտնվելու հարցը, բայց այն պարագայում, երբ կընդունվի իրենց կողմից ներկայացվող ծրագիրը, անհասկանալի կլինի դա իրագործելու առաջարկից հրաժարումը: «Եթե մեր մոտեցումներն ընդունվեն, մենք ամեն տեղ էլ պատրաստ կլինենք մտնել ու ստանձնել պարտավորություններ»,- ասել է Ռուստամյանը:

ՀՀԿ խմբակցության ղեկավար Գալուստ Սահակյանը «Արմենպրես»-ի հետ զրույցում տեղեկացրեց, որ վարչապետի թեկնածության հարցը կուսակցության առաջիկա ԳՄ նիստում' ապրիլի 10-ին, կարող է քննարկվել, եթե արդեն հայտնի լինեն խորհրդարանական քաղաքական ուժերի և ՀՀ Նախագահի խորհրդակցությունների արդյունքները: Նա նաև նշել է, որ երկրին անհրաժեշտ է ավելի շատ համաձայնեցված աշխատանք. այդ իմաստով համագործակցությունը քառյակի հետ հնարավոր է:

ԲՀԿ խմբակցության պատգամավորների հետ կապ հաստատել չհաջողվեց: Քաղաքական այդ ուժի ներկայացուցիչներն ավելի վաղ չէին բացառել ԲՀԿ-ի՝ նոր կառավարությանը մաս դառնալը:

Ապրիլի 3-ին ՀՀԿ ԳՄ նիստի ժամանակ ՀՀԿ գործադիր մարմինն ընդունել է ՀՀ վարչապետ Տիգրան Սարգսյանի հրաժարականի դիմումը: Նույն օրը երեկոյան Տիգրան Սարգսյանը ֆեյսբուքում կատարած գրառմամբ տեղեկացրել է, որ դեռևս փետրվարին հանրապետության նախագահ Սերժ Սարգսյանին դիմել է խնդրանքով՝ ընդունել իր հրաժարականը, սակայն պայմանավորվածություն է ձեռք բերվել դիմումի ներկայացման պահը հետաձգել' մի շարք կարևոր պետական միջոցառումների և ՀՀԿ տնտեսական համաժողովի անցկացման անհրաժեշտությունից ելնելով: ՀՀ Սահմանադրության 55-րդ հոդվածի համաձայն' հանրապետության Նախագահը վարչապետ է նշանակում կառավարությանհրաժարականի ընդունումից հետո՝ տասնօրյա ժամկետում: Կառավարությունը կազմավորվում է վարչապետի նշանակումից հետո' քսանօրյա ժամկետում: ՀՀ նախագահն ապրիլի 3-ին հրամանագիր է ստորագրել' կառավարության հրաժարականն ընդունելու մասին: