«Հրապարակում կային սադրիչներ, և արյունը սկվսում էր թափվել». Րաֆֆի Հովհաննիսյան

Այսօր, Ազատության հրապարակում, «Ժառանգություն» կուսակցության առաջնորդ Րաֆֆի Հովհաննիսյանը հանդես եկավ հանրային հայտարարությամբ.

«Այսօր երկար-բարակ պետք է խոսեի անցյալի մասին, ուրիշներին քննադատեի, ինձ արդարացնեի, բայց դա չեմ անելու, որովհետև այսօր Հայաստանում սկսվել է նոր վիճակ` անցյալի կիսատ մնացած գործը ի կատար ածելու համար»: Այսպես սկսեց իր հայտարարությունը ընդդիմադիր կուսակցության առաջնորդը:

Րաֆֆի Հովհաննիսյանը իր ելույթում զգուշացրեց, որ մեր երկրում մեծ պայթյուն է սպասվում, և աստված չանի, որ այդ մեծ պայթյունը լինի մեր սահմանում` Արցախում` ուրիշների ձեռքով: Հույս հայտնեց, որ այն կանի Աստված և ՀՀ քաղաքացին, որպեսզի լինի խաղաղ, սահմանադրական ճանապարհով: 

«Մեր ավետյաց երկրում ազատության համար ժամանակը մի փոքր ուշանում է, բայց մոտալուտ է: Կառավարության հրաժարականը, որը պահանջում էր հասարակությունը, արդեն կատարվեց` առանց շուրջօրյա ցույցերի, պահանջների: Մենք արդեն գտնվում ենք պատմական շրջափուլում:

Այսօր միացյալ հրապարակ չկա, բայց ես վստահ եմ, որ այս ամսում կլինի: Ափսոսում եմ, որ նախնական պայմանավորվածությունը` Գյումրիում միացյալ հանդես գալը, չստացվեց, բայց ոչինչ: 

Եթե որևէ մեկին հուսախաբ եմ արել` ես ներողություն եմ խնդրում, բայց ես ուզում եմ մի բան շատ հստակ իմանաք, որ այդ օրը առանց իշխանափոխության լինելու էր արյուն, կային սադրիչներ երկու կողմում էլ, հենց այս հրապարակում կանգնած և ոստիկանական դիրքերի ետևում, և արյունը սկսվում էր թափվել, և ես Արմենուհու հետ առաջին գծի վրա կանգնած` պատրաստ չէի, որ այդ արյունն այցելի որևէ հայ ընտանիքի: Իսկ նրանք, ովքեր սադրեցին ` փախան: Այդ սադրիչները հեքիաթ հյուսեցին համատեղ աղոթքի մասին: Խնդրեմ, եթե ձեզ ուրիշ բան չի մնում, քան այդ հեքիաթը, որքան ուզում եք արդարացրեք ձեր անգարագիտությունը, անկարողությունը»,- ասաց Րաֆֆի Հովհաննիսյանը: