«Ես տեսա պարոն ոստիկանապետի քմծիծաղը աղոթքի պահին». Րաֆֆի Հովհաննիսյան

Քիչ առաջ ավարտվեց Րաֆֆի Հովհաննիսյանի Ազատության հրապարակում կազմակերպած հավաքը, որտեղ վերջինս հանդես եկավ հայտարարությամբ:

Լրագրողների հետ զրույցում Րաֆֆի Հովհաննիսյանը հույս հայտնեց, որ 4 խմբակցությունները, բացի խորհրդարանի ներսում իրենց համագործակցությունից, մոտ ապագայում խորհրդարանից դուրս համագործակցություն ևս ձեռք կբերեն, որը կհանգեցնի իշխանափոխության: «Մենք կարծում ենք` այս իշխանությունը, պարոն Սարգսյանից սկսած, պետք է հեռանա»,- ասաց ընդդիմադիր կուսակցության առաջնորդը:

Հարցին, թե տեսակետ կա, որ այս համագործակցության արդյունքում ՀԱԿ-ն ու «Ժառանգությունը» հայտնվում են լուսանցքում, պատասխանեց. «Օհ, լուսանցքում ես թող հայտնվեմ, մնացածը ապրած կենան, բայց այստեղ լուսանցքի խնդիր չէ»:

Րաֆֆի Հովհաննիսյանը չկիսեց այն տեսակետը, որ այսօր ՀՅԴ-ն և ԲՀԿ-ն պաշտոնի կռիվ են տալիս, և նշեց, որ փաստի դեպքում կտա համապատասխան արձագանք, իսկ հիմա ենթադրությունների վրա չի ցանկանում հիմնվել:

 Րաֆֆի Հովհաննիսյանը, ևս մեկ անգամ անդրադառնալով անցած տարի հենց այս օրը տեղի ունեցած դեպքերին, վերհիշեց, որ ժողովդրի պահանջով իրենք գնացին դեպի Բաղրամյան պողոտա, հետո պետք է գնային Ծիծեռնակաբերդ: Այդ ընթացքում կար մի փոքր ընդհարում: Արդեն նկատելի էին սադրիչները, և արդեն արյան վտանգը կար, և երբ որոշել են քայլել Ծիծեռնակաբերդ, ըստ Րաֆֆի Հովհաննիսյանի, պարոն ոստիկանապետը «Սերժիկ, հեռացիր» գոչյունների ներքո իրենց հետևից հասավ, և դրանից հետո հյուսվեց բանահյուսությունը: 

«Ես տեսա պարոն ոստիկանապետի քմծիծաղը աղոթքի պահին, ես այլևս ասելիք չունեմ, դրա համար` վերջ դրեք»,- չցանկանալով շարունակել նույն թեմայով` խոսքն ավարտեց Հովհաննիսյանը: