«Հրապարակ». Լևոն Տեր-Պետրոսյանը երեկ վերջնագրային խոսք հնչեցրեց

Մինչ քաղաքական շրջանակներում մղձավանջի են վերածվել նոր կառավարության եւ նոր ակնկալիքների հետ կապված սպասումները, իսկ ՀՅԴ-ն ու ԲՀԿ-ն ապագա կառավարության արեւի տակ տեղ գտնելու «տասովկաների» մեջ են, ՀԱԿ առաջնորդ Լևոն Տեր-Պետրոսյանը երեկ վերջնագրային խոսք հնչեցրեց՝ ասելով. «Ընդդիմությունը ոչ մի պարագայում խաղերի մեջ չպետք է մտնի Սերժ Սարգսյանի հետ եւ չպետք է մաս կազմի նրա կողմից ձեւավորված որեւէ կառավարության»: Գրում է «Հրապարակ»-ը:

Որովհետեւ, ըստ առաջին նախագահի, փաստացի տիրապետելով ուժային կառույցներին, դատախազությանը, դատական համակարգին եւ տեղեկատվական ոլորտին, «Սերժ Սարգսյանն ի վիճակի է ընդամենը մի քանի ամիսների ընթացքում վարկաբեկել ցանկացած կառավարության' վարչախմբի բոլոր անհաջողությունները բարդելով նրա վրա»: ՀԱԿ առաջնորդի կարծիքով, պետք է, այդուհանդերձ, քառյակը շուրջօրյա հանրահավաքների միջոցով անմիջապես բարձրացնի Սերժ Սարգսյանի հրաժարականի հարցը կամ էլ, ընտրելով միջանկյալ եւ իշխանափոխության ավելի փափուկ տարբերակ, խորհրդարանական քննարկումների օրերին, կրկին շուրջօրյա հանրահավաքների ճնշման տակ, երիցս վիժեցնի նոր կառավարության ծրագրի ընդունումը՝ ստիպելով Սարգսյանին, Սահմանադրության համաձայն, ցրել խորհրդարանը եւ Ազգային ժողովի արտահերթ ընտրություններ անցկացնել:

Տեր-Պետրոսյանի մոտ, ըստ քաղաքագետ Հմայակ Հովհաննիսյանի, խաբված լինելու տրամադրություններ կան, որովհետեւ կամ գիտի, կամ ենթադրում է, որ վաղը քառյակի երկու ուժերը կարող են իշխանության հետ համատեղ աշխատել ազգային համերաշխություն հորջորջվող կառավարությունում:

«Ես վաղուց եմ ասել, որ Գագիկ Ծառուկյանը մատնոցի նման դիմադիր ուժերին եւ նախագահներին խաղացնում է մատների վրա, եւ վերջում Տեր-Պետրոսյանին էլ, փաստորեն, խաբվածի ճակատագիրն էր սպասվում»,- ասում է Հմայակ Հովհաննիսյանը եւ ասելիքը եզրափակում, չցանկանալով ծավալվել, որովհետեւ դրա համար ինքը «ծանր» է հատուցում՝ օրեցօր նոր դատական հայցեր ստանալով: Հիշեցնենք, որ Տեր-Պետրոսյանի կասկածներն այդպես էլ չփարատվեցին ԲՀԿ-ի կողմից, որոշ ԲՀԿ-ականներ արձագանքեցին, բայց հերքումներ եղան միայն «կոալիցիոն» կառավարություն կազմելու մասին: «Մենք որեւէ մեկի հետ խաղերի մեջ չենք մտել եւ չենք մտնի: Քաղաքականության մեջ խաղալը վատ բան է, իսկ մեր օրակարգում կոալիցիայի հարց չկա»,- հայտարարեց Ստեփան Մարգարյանը: «Պետք է լինի կուրսի, ծրագրային փոփոխություն եւ ոչ թե զուտ անձերի փոփոխություն, ինչը մեզ համար ընդունելի չէ»,- կարծում է ԲՀԿ-ական մեկ այլ պատգամավոր՝ Միքայել Մելքումյանը, ով փոխանցում է, որ Սերժ Սարգսյանի հետ հանդիպման ժամանակ ԲՀԿ-ն ներկայացնելու է իր մոտեցումները:

Որոշ տեղեկություններով, այդ մոտեցումները, որոնք Գագիկ Ծառուկյանն արդեն հասցրել է ներկայացնել Սերժ Սարգսյանին՝ մինչ Թուրքմենստան գնալը, հետեւյալն են. նա առաջարկել է գործադիրը հանձնել իրենց, որն իրենք կձեւավորեն առավելապես ոչ իշխանական անձերից, ներդրումներ կանեն, նոր ծրագրեր կիրականացնեն, մի խոսքով՝ երկիրը դուրս կբերեն փոսից: Ընդ որում՝ ուժային կառույցներում եւս վերադասավորումների պահանջ է ներկայացվել եւ ոչ իշխանական ուժերին վերահսկողության գործառույթների ընձեռում: Հատկապես շեշտվել է Վովա Գասպարյանի հարցը, որը Տիգրան Սարգսյանից հետո Ծառուկյանի եւ ԲՀԿ-ի թիրախային կենտրոնում է՝ մարզերը ԲՀԿ-աթափ անելու իր նկրտումների պատճառով: Առաջարկել են, որ կառավարության ղեկավար էլ իրենց «մարդուն» նշանակեն, իհարկե, Սերժ Սարգսյանի հավանությամբ, որպեսզի կարողանան վերականգնել «ավերված» տնտեսությունը:

Ի դեպ, այս համատեքստում ուշագրավ են Ծառուկյանի վերջին հանդիպումները, որոնք ժամը մեկ ցուցադրվում են նրա հեռուստաալիքով: Նա մեկ եվրոպական ինչ-որ պատվիրակություն է ընդունում, մեկ խոսում է տնտեսության մեջ ներդրումների մասին, մեկ ցուցադրվում է, թե մարդիկ ինչքան են հավատում ու գնահատում նրան: Ասենք, արձագանքելով ԲՀԿ ղեկավարի կոչին, ազգությամբ սլովակ եւ բուլղար մի շարք գործարարներ պատրաստակամություն են հայտնել ներդրումներ կատարել մեր երկրում, եւ այդ առիթով ԲՀԿ-ն հաղորդագրություն է տարածում:

Շարունակությունը` «Հրապարակ» օրաթերթի այսօրվա համարում: