Ռագըփ Զարաքոլուն ելույթ է ունեցել Կապիտոլիումի բլրում Հայոց ցեղասպանության զոհերի հիշատակի միջոցառմանը

ԱՄՆ Սենատի արտաքին հարաբերությունների հանձնաժողովի նախագահ, սենատոր Ռոբերտ Մենենդեսը և Ներկայացուցիչների պալատի նույն հանձնաժողովի նախագահ Էդ Ռոյսն ապրիլի 9-ին միացել են իրենց ավելի քան երկու տասնյակ օրենսդիր-գործընկերներին' մասնակցելու Կապիտոլիումի բլրում Հայոց ցեղասպանության զոհերի հիշատակին նվիրված միջոցառմանը: Ամենամյա միջոցառմանն այս տարի առաջին անգամ մասնակցել և ելույթով է հանդես եկել թուրք մտավորական, ակտիվիստ, մարդու իրավունքների պաշտպան Ռագըփ Զարաքոլուն:

Հայերի դեմ իրականացված ցեղասպանության անհերքելի փաստը ճանաչած թուրք մտավորականը կոչ է արել ԱՄՆ-ին ևս ճանաչել Հայոց ցեղասպանությունը և վերջ դնել Թուրքիայի ժխտողական քաղաքականությանը: «Անխոս Միացյալ Նահանգները Թուրքիայի լավ ընկերն է, սակայն եթե իրական ընկեր է, պետք է այլ կերպ գործի: Պետք է աջակցի Թուրքիայի ժողովրդավարությանը, իսկ Թուրքիայում իրական ժողովրդավարության հնարավոր է հասնել' առերեսվելով պատմությանը' մեր պատմությանը, 1915 թվականի իրականությանը»,-իր խոսքում նշել է Զարաքոլուն:

Հայոց ցեղասպանության հիշատակի միջոցառումը կազմակերպվել էր Կոնգրեսում Հայաստանին աջակցող խմբի, ԱՄՆ-ում Հայաստանի Հանրապետության դեսպանության, Նյու Յորքում Լեռնային Ղարաբաղի Հանրապետության ներկայացուցչության գրասենյակի և ԱՄՆ-ի հայկական կազմակերպությունների ջանքերով:

«Մենք անչափ գոհ ենք, որ Ռագըփ Զարաքոլուի խիզախ հաղորդագրությունն այս երեկո լսելի դարձավ ԱՄՆ Կոնգրեսի դահլիճում: Հարգված թուրք մտավորականի, Կոնգրեսի Սենատի և Ներկայացուցիչների պալատի արտաքին հարաբերությունների հանձնաժողովների նախագահներ Մենենդեսի և Ռոյսի, ինչպես նաև գրեթե երկու տասնյակ դաշնային օրենսդիրների հնչեցրած հզոր խոսքերն ուժեղ ազդանշան էին Թուրքիայի և այստեղ' Վաշինգտոնում, նրա դաշնակիցների համար, որ ցուցում էին մեր համայնքի սկզբունքային դիրքորոշման և ճշմարտության ու արդարության հանդեպ տոկուն նվիրվածության մասին»,-նշել է Հայ դատի ԱՄՆ հանձնախմբի գործադիր տնօրեն Արամ Համբարյանը: