Կուտակայինի մասին օրենքում փոփոխություններից հետո անհրաժեշտության դեպքում կիրականացվի վերահաշվարկ. Արտեմ Ասատրյան

Կուտակային կենսաթոշակային համակարգի վերաբերյալ Սահմանադրական դատարանի որոշումից հետո առկա է մեկ կարևորագույն խնդիր՝ գործող օրենսդրությունը համապատասխանեցնել սահմանադրությանը: Կառավարության նիստից հետո լրագրողների հետ զրույցում այդ մասին նշեց ՀՀ աշխատանքի և սոցիալական հարցերի նախարարի պաշտոնակատար Արտեմ Ասատրյանը: «Այդ առումով, ձևավորված աշխատանքային խումբն իրականացնում է համապատասխան աշխատանքներ: Մեր թիվ մեկ խնդիրն է ՝ դուրս բերել բոլոր այն դիտարկումները, որոնք մատնանշվել են ՍԴ-ի կողմից, և օրենքի շրջանակներում տալ համապատասխան լուծումներ»,-ասաց Ասատրյանը:

Անդրադառնալով վերահաշվարկի հետ կապված խնդրին՝ նախարարի պաշտոնակատարը նշեց, որ եթե նախաձեռնվող փոփոխություններով հարցեր առաջանան վճարումների չափի հետ կապված, ապա կիրականացվեն անհրաժեշտ վերահաշվարկներ՝ օրենքով սահմանված կարգով:

ՀՀ Սահմանադրական դատարանը ապրիլի 2-ին հրապարակեց «Կուտակային կենսաթոշակների մասին» ՀՀ օրենքի 5, 7, 8, 37, 38, 45, 49 և 86-րդ հոդվածների սահմանադրականության վերաբերյալՍահմանադրական դատարանի որոշումը: Որոշման համաձայն' Սահմանադրությանը հակասողճանաչվեցին օրենքի հիշյալ դրույթները: