Հանրապետության նախագահը շարունակում է կողմնակից մնալ գործող կառավարման համակարգին

Հայաստանի Հանրապետության նախագահ Սերժ Սարգսյանը մտադիր չէ երկրի ղեկը վերստին ստանձնել Սահմանադրական բարեփոխումներից հետո կառավարման այլընտրանքային համակարգի անցնելու դեպքում նույնիսկ: Այդ մասին ապրիլի 10-ին հայտնեց ՀՀ Սահմանադրական դատարանի նախագահ Գագիկ Հարությունյանը՝ ՀՀ սահմանադրական բարեփոխումների հայեցակարգի նախագծի նախնական տարբերակը երկրի ղեկավարին ներկայացնելուց հետո կայացած ճեպազրույցում: «Այսօր հանձնաժողովի համար նույնպես անսպասելի էր հանրապետության նախագահի հայտարարությունը, այն առումով, որ եթե նախապատվություն տրվի (կառավարման-խմբ.) այլընտրանքային տարբերակին, ապա ինքը որևէ ակնկալիք չունի, այս կամ այն տարբերակի դեպքում նորից պետության ղեկը ստանձնելու՝ կամ վարչապետի կամ նախագահի կարգավիճակով»,- նշեց Հարությունյանը՝ հավելելով, որ երկրի ղեկավարը չի ցանկանում հանձնաժողովին կաշկանդել որևէ սահմանադրաի րավական մոդելի առաջադրման կամ վերջնական կողմնորոշման հարցում: ՍԴ նախագահը նշեց, որ պետք է անկաշկանդ քննարկումներ ծավալել և ընտրել ճիշտ տարբերակը, որը պետության ապագային է միտված:

Հարությունյանը հայտնեց, որ Սահմանադրական բարեփոխումների հայեցակարգի նախագծով չի նախատեսվում պարտադիր անցում կատարել կառավարման խորհրդարանական համակարգին: «Նախագծով առաջին հերթին նախատեսվում է բարեփոխել գործող համակարգը և դրա վերաբերյալ առաջարկվում են կոնկրետ մոտեցումներ»,- նշեց ՍԴ նախագահը: Հարությունյանը պարզաբանեց, որ կառավարման ձևի ընտրությունը իրավաքաղաքական խնդիր է. առանց քաղաքական կուսակցությունների ու քաղաքական համակարգի հստակ դիրքորոշման փոփոխություն անել հնարավոր և նպատակահարմար չէ :

ՀՀ արդարադատության նախարարի պաշտոնակատար Հրայր Թովմասյանն էլ նշեց, որ հանրապետության Նախագահը շարունակում է կողմնակից մնալ գործող կառավարման համակարգին: