Սահմանադրական բարեփոխումների հանձնաժողովը հանրային քննարկումներ կանցկացնի առաջարկվող փոփոխությունների շուրջ

Հայաստանի Հանրապետության նախագահին առընթեր սահմանադրական բարեփոխումների մասնագիտական հանձնաժողովը դիմել է ՀՀ նախագահին սահամանդրական բարեփոխումների հայեցակարգի նախագծի ներկայացման վերջնաժամկետը մինչև հուլիսի 1-ը երկարաձգելու խնդրանքով: Այս մասին լրագրողներին տեղեկացրեց ՀՀ Սահմանադրական դատարանի նախագահ Գագիկ Հարությունյանը նախագահ Սերժ Սարգսյանի հետ հանդիպ ումից հետո: «Մենք աշխատանքները բաժանել ենք հետևյալ փուլերի' սահմանադրական բարեփոխումների հայեցակարգի նախագծի մշակում և նախագահի կողմից այդ հայեցակարգի ընդունման պարագայոմ փոփոխությունների փաթեթի մշակում, որի համար նախատեսվում է 10 ամիս: Մենք հայեցակարգի ամբողջական փաթեթը նախագահին պետք է ներկայացնեինք ապրիլի 20-ին, այսօր մենք խնդրեցինք Սերժ Սարգսյանին, որ այդ ժամկետը երկարաձգվի, քանի որ հանձնաժողովը գտավ, որ մի շարք հարցերի շուրջ հիմնական դիրքորոշումների հստակեցման համար կարևոր են հասարակության արձագանքները»,-ասաց Գագիկ Հարությունյանը' նշելով, որ հայեցակարգի նախագծի մշակման ժամանակ հստակեցվել են սկզբունքները, որոնցով պետք է իրականացվեն փոփոխությունները, հիմնական ուղիները և այն խնդիրներ, որոնք պետք է լուծել:

ՍԴ նախագահի խոսքով' մինչ հունիսի 1-ը հանձնաժողովը կկազմակերպի հանրային քննարկումներ, որոնց կմասնակցեն թե′ մասնագիտական լսարանները, թե′ հասարակ քաղաքացիները: «Նախատեսել ենք օգտագործել Իրավաբանների միության, Սահմանադրական իրավունքի կենտրոնի և այլ հասարակական կազմակերպությունների հնարավորությունները: Բաց քննարկումներ կլինեն լրատվամիջոցների, քաղաքացիների ու մասնագետների մասնակցությամբ: Առաջիկա մեկ շաբաթը կլինի հայեցակարգի նախագծի վերաբերյալ առաջին արձագանքների ստացման ժամանակահատված, որից հետո հաջորդ ուրբաթ հանձնաժողովը նիստ կհրավիրի, արձագանքներից ելնելով մենք կորոշենք քննարկումների ձևաչափը»,-տեղեկացրեց Գագիկ Հարությունյանը' հավելելով, որ հաշվի կառնեն նաև լրատվամիջոցների կողմից արվող առաջարությունները քննարկումների ձևաչափի առնչությամբ:

Նրա խոսքով' հնարավոր է նաև քննարկումների անցկացում քաղաքական կուսակցությունների հետ, որի ժամանակ լսելի կլինեն նաև նրանց դիտարկումները: «Մինչ հուլիսի 1-ը մենք կկազմակերպենք այս փուլի երրորդ վերջնական քննարկումը Վենետիկի հանձնաժողովի հետ: Հունիսի վերջին տասնօրյակում հանձնաժողովը քվեարկությամբ կվավերացնի հայեցակարգի նախագիծը, որից հետո այն կներկայացնենք ՀՀ նախագահին: Եթե նախագահը հաստատի նախագիծը, այն կդառնա բարեփոխումների հայեցակարգ, որից հետո էլ բուն փոփոխությունների փաթեթը կմշակվի»,-ասաց ՍԴ նախագահը:

Գագիկ Հարությունյանը հանրային քննարկումների ժամանակ կարևորում է բոլոր առանցքային հարցերի շուրջ քննարկումների ծավալումը: