Ուորլիքը հանդիպել է Հայ դատի ԱՄՆ հանձնախմբի նախագահ Քեն Խաչիկյանի հետ

ԵԱՀԿ Մինսկի խմբի համանախագահ Ջեյմս Ուորլիքը հանդիպել է Հայ դատի ԱՄՆ հանձնախմբի նախագահ Քեն Խաչիկյանի հետ: Այս մասին դիվանագետը գրել է Twitter-ի իր միկրոբլոգում:

«Այսօր հանդիպել եմ Հայ դատի ԱՄՆ հանձնախմբի նախագահ Քեն Խաչիկյանին, ով ներկայացնում է ամերիկահայության ձայնը»,- նշել է Ուորլիքը:

Հանդիպման մանրամասները չեն ներկայացվում:

1944 թվականից սկսած Հայ հեղափոխական դաշնակցության նախաձեռնությամբ ձևավորել է Հայ դատի շարժումը, որի արդյունքում Հայ դատի հանձնախմբեր են ստեղծվել ԱՄՆ-ում՝ Վաշինգտոնում, Բոստոնում, Լոս Անջելեսում, Ֆրեզնոյում, հայաշատ այլ վայրերում, ավելի ուշ՝ Եվրոպայի, Մերձավոր Արևելքի, Լատինական Ամերիկայի մի շարք երկրներում, Ռուսաստանում, 1991 թ-ից՝ Երևանում:

Հայ դատի հանձնախմբերը Հայկական հարցի պահանջատերերն են և գործուն աջակցություն են ցուցաբերում Հայոց ցեղասպանությունը դատապարտող օրենսդրական ակտերի ու բանաձևերի ընդունման գործընթացում, պայքարում պատմական Հայաստանի տարածքում հայկական հուշարձանների և մշակութային այլ արժեքների ոչնչացման դեմ, սատարում արցախահայության արդարացի պայքարին:

Նրանց ջանքերի շնորհիվ ԱՄՆ-ի Կոնգրեսի Ներկայացուցիչների պալատը (1975, 1984, 1996 թթ.), Եվրոպայի խորհրդարանը (1987 թ.) և բազմաթիվ երկրների խորհրդարաններ Հայոց ցեղասպանությունը դատապարտող բանաձևեր են ընդունել, իսկ ԱՄՆ-ի Սենատը՝ կարևոր հանձնարարական (1989 թ.) Լեռնային Ղարաբաղի վերաբերյալ: