Մկրտիչ Մինասյանի համար ցանկալի չէ այգիներում սրճարանների առկայությունը

Հայաստանի ճարտարապետների միության նախագահ Մկրտիչ Մինասյանը Երևան քաղաքի գեղեցկության ապահովման գործում կարևորում է կանաչապատ տարածքների պահպանումն ու ընդայնումը: Ապրիլի 10-ին լրագրողների հետ հանդիպմանը Մինասյանը ցավով նշեց, որ Երևանի գրեթե բոլոր այգիներում և կանաչապատ վայրերում ինչ-որ կառույցներ և սրճարաններ են հայտնվում, ինչը ցանկալի չէ: «Ես կարծում եմ, որ մենք պետք է սկզբից չթողնեինք, որ այս սովորությունը արմատանար: Օրինակ, եթե Թբիլիսի գնաք, կտեսնեք, որ այնտեղ ոչ մի այգում որևէ կառույց չկա, Ղազախստանի մայրաքաղաք Աստանայում նույնիսկ անտառներ են տնկում, իսկ մենք մեր այգիներում սրճարաններ ենք կառուցում: Մեզ մոտ կլիման էլ վտանգավոր է, և անհրաժեշտ խոնավություն ապահովելու համար հարկավոր է հնարավորինս շատ կանաչապատ տարածքներ ստեղծել, սակայն մեզ մոտ հակառակն է տեղի ունենում»,-նշեց Մինասյանը:

Նրա խոսքով` Բելառուսի մայրաքաղաք Մինսկում նույնպես բազմաթիվ անտառապուրակներ կան: «Իսկ մենք, ունենալով Հաղթանակի զբոսայգու նման հիանալի տարածք, դրա մի մասը հատկացրեցինք հյուրանոցի շինարարությանը, սակայն հասկանալի է, որ այդ հյուրանոցի տարածքը բոլորին չէ, որ ծառայելու է»,- ասաց նա:

Մինասյանը մտահոգություն հայտնեց, որ այդ հյուրանոցի մոտակայքում կրկին հողատարածք է հատկացվել, որպեսզի նոր հյուրանոց կառուցվի այնտեղ: Նրա խոսքով` անհրաժեշտ է նորանոր կանաչապատ տարածքներ ստեղծել, ոչ թե ավերել եղածները: