Տրամաբանական շարունակություն

Երեկ՝ ապրիլի 10-ին, մինչ գրեթե ողջ հայությունը սպասում էր` ուր որ է կհրապարակվի ՀՀ 13-րդ վարչապետի անունը, այդ ընթացքում կայացել է ՀԱԿ-ի, ԲՀԿ-ի և «Ժառանգության» առաջնորդների հանդիպումը:

Հանդիպմանը ներկա են եղել նաև Հայաստանի Ժողովրդական կուսակցության նախագահ Ստեփան Դեմիրճյանը, «Հայ Ազգային Կոնգրես» խմբակցության ղեկավար Լևոն Զուրաբյանը, ԱԺ ԲՀԿ պատգամավորներ Վարդան Օսկանյանը, Ստեփան Մարգարյանը, «Ժառանգություն» խմբակցության ղեկավար Ռուբեն Հակոբյանը, կուսակցության փոխնախագահ Արմեն Մարտիրոսյանը:

Հանդիպումից հետո տարածվեց հաղորդագրություն, որում ասված էր, որ հանդիպման ժամանակ քննարկվել են երկրում ստեղծված նոր քաղաքական իրավիճակում համատեղ քաղաքական օրակարգի և գործողությունների ծրագրի ձևավորման հարցեր:

«Ժառանգություն» խմբակցության ղեկավար Ռուբեն Հակոբյանը Լուրեր.com-ի հետ զրույցում ասաց, որ հրապարակված հաղորդագրությունից ավել բան ինքը չունի ասելու, իսկ թե ինչ կտա հետագայում այս հանդիպումը, Հակոբյանը պատասխանեց. «Հանդիպումը, բնականաբար, տրամաբանական շարունակությոնն էր այս մի քանի ամիսների ընթացքում խորհրդարանական չորս ոչ իշխանական ուժերի համագործակցության»: