«Թևանիկ» ֆիլմի թրեյլերն արդեն հնարավոր է դիտել Youtube-ում (տեսանյութ)

Արցախյան ազատամարտի մասին հայ-լիտվական համատեղ արտադրությամբ ստեղծված նոր' «Թևանիկ» ֆիլմի պաշտոնական թրեյլերը ապրիլի 11-ից հնարավոր է դիտել Youtube կայքում: Այս մասին «Արմենպրես»-ի թղթակցի հետ զրույցում նշեց ֆիլմի ռեժիսոր Ջիվան Ավետիսյանը: Գրեթե երկու րոպե տևողությամբ թրեյլերում ներկայացված են ֆիլմի հետաքրքրական դր վագները:

Հայ ժողովրդի հերոսական էջերից մեկը նկարագրող նոր ֆիլմի պրեմիերան տեղի կունենա մայիսի 5-ին: Ֆիլմը մայիսի 6-ից հնարավոր կլինի դիտել քաղաքի կինոթատրոններում: «Սպասում և համոզմունք». հենց այս զգացողություններով է Ջիվան Ավետիսյանը պատրաստվում Ադրբեջանի հիստերիան առաջացրած կինոնկարի պրեմիերային:

«Թևանիկը» պատմություն է երեք պատանիների մասին, ովքեր բնավ չեն պատկերացնում, թե ինչ է պատերազմը: «Ֆիլմը ներկայացնում է արցախյան ազատամարտի տարիները' մասնավորապես սկզբնական շրջանը, երբ պատերազմի վտանգն էր դեռ կախված մարդկանց գլխին, և մարդիկ ամբողջությամբ պատերազմի մեջ չէին: Ֆիլմը պատմում է 14 տարեկան երեք պատանու մասին, ովքեր ևս, մեծահասակների պես, բնավ չեն պատկերացնում, թե ինչ է պատերազմը: Անկախ իրենց կամքից' նրանք պատերազմի դաժան դրոշմը կրում են իրենց վրա' տարբեր կերպ: Բայց հետո բոլորը համախմբվում են խրամատում: Պատերազմ է: Պատեր ազմ, որի մասին իրենք էլ պատկերացում չունեն և չեն էլ հասցնում ըմբռնել' ինչ է դա: Պատերազմի դաժանությունը վերջ է դնում շատերի կյանքին»,-մեզ հետ զրույցում ավելի վաղ նշել էր Ջիվան Ավետիսյանը:

«Թևանիկը» նկարահանվել է Առնոլդ Աղաբաբովի համանուն կինոսցենարի հիման վրա: Բացի դրանից, Ջիվան Ավետիսյանը և Կարինե Խոդիկյանը, միասին աշխատելով, մեկ պատանու մասին պատմող սցենարին ավելացրել են ևս երկու պատանու պատմություն: Այն ամբողջությամբ նկարահանվել է Արցախում: Կինոնկարի համար երաժշտություն է գրել լիտվացի կոմպոզիտոր Յոնաս Յուրկունասը: Այն ձայնագրվել է օպերայի և բալետի ազգային ակադեմիական թատրոնի սիմֆոնիկ նվագախմբի և «Հովեր» երգչախմբի կատարմամբ: Փաստը մեծ արձագանք է գտել Ադրբեջանում' առաջացնելով հարևան երկրի զայրույթ ը:

Ֆիլմը նախատեսված է ներկայացնել Կաննի կինոշուկայում: Այն ստեղծվել է Արցախի կառավարության օժանդակությամբ: Լիտվական կողմն իրականացրել է աշխատանքներ պատկերի վրա' ապահովելով գույն, գրաֆիկա, հատուկ էֆեկտներ և երաժշտություն: Համարտադրող է հանդիսանում Հայաստանի ազգային կինոկենտրոնը:

Ռոզա Գրիգորյան