«Հրապարակ». Ընդդիմադիր 4 ուժերի առաջնորդների` ապրիլի 10-ի հանդիպման մասին ոչ ոք չգիտեր

Հայկական Մամուլ 12 Ապրիլ, 2014 7:24

Ընդդիմադիր 4 ուժերի առաջնորդների' ապրիլի 10-ի հանդիպման մասին ոչ ոք չգիտեր: Նույնքան անսպասելի էր Սերժ Սարգսյանի' ապրիլի 10-ի ելույթը սահմանադրական բարեփոխումների խորհրդի անդամների առաջ, երբ նա հայտարարեց, որ չի պատրաստվում այլեւս նախագահ դառնալ: Չի բացառվում, որ սա փորձ էր կանխելու Գագիկ Ծառուկյանի հետագա մերձեցումն ավելի արմատական ընդդիմադիրների հետ, որը, սակայն, չհաջողվեց, եւ Տեր-Պետրոսյան-Ծառուկյան-Դեմիրճյան-Րաֆֆի հանդիպումը կայացավ: Գրում է «Հրապարակ»-ը:

ՀՅԴ-ն իր՝ հանդիպմանը չմասնակցելը չի բացատրում որպես քառյակը պառակտելուն ուղղված քայլ, դա ավելի շատ բացատրվում էր հանդիպման ֆորմատի հետ կապված դժգոհությամբ՝ Դաշնակցությունում համակարծիք են, եւ ԳՄ ներկայացուցիչն ու ԱԺ խմբակցության ղեկավարներն արտահայտում են կուսակցության տեսակետը: Այնպես որ առաջնորդների մակարդակով հանդիպման անհրաժեշտությունը չեն տեսնում: Թերեւս, դեր է խաղում նաեւ այն, որ Հրանտ Մարգարյանը դժվարությամբ է նստում իրեն 3 տարի բերդում «նստեցրած» Լեւոն Տեր-Պետրոսյանի կողքին:

Այնուամենայնիվ, ի՞նչ են քննարկել հանդիպման ժամանակ: Կողմերը լռում են: Խոսեց միայն ԲՀԿ-ական Ստեփան Մարգարյանը, ով ոչ մի գաղտնիք չբացահայտեց: Լռությունը, թերեւս, նույնպես համաձայնեցված է եղել բանակցող կողմերի միջեւ: Բացի այդ՝ «ուժերը» ջենթլմենական պայմանավորվածություն ունեն. մամուլի հետ խոսելու լիազորությունը տրվում է նրան, ում տարածքում տեղի է ունեցել հանդիպումը: Դատելով սրանից, ինչպես նաեւ համացանցում պտտվող միակ լուսանկարից, որտեղ Ծառուկյանի ճաշակին վայել կահավորում է երեւում, կարելի է ենթադրել, որ առաջնորդները հանդիպել են ԲՀԿ առաջնորդին պատկանող տարածքում: Ստեփան Մարգարյանի՝ «ԳԱԼԱ»-ին հայտնած «մանրամասներից» ուշագրավ է թերեւս մեկը. «Կառավարության հրաժարականի հետ կապված ստեղծվել է նոր քաղաքական իրավիճակ, եւ հետագա համագործակցության խնդիրները պետք է վերանայվեին»:

Փաստ է, որ «նոր քաղաքական իրավիճակը» Սերժ Սարգսյանի եւ Ծառուկյանի չստացված խոսակցության հետեւանքն է: Մեր տեղեկություններով՝ նախագահի հետ հանդիպման ժամանակ ԲՀԿ առաջնորդը նրան հասկացրել է, որ ամենեւին չի գայթակղվում իր խնամուն՝ Հովիկ Աբրահամյանին վարչապետի պաշտոնում տեսնելու հեռանկարով եւ չի պատրաստվում մտնել կոալիցիա. ԲՀԿ-ն ունի իր ծրագիրը, որն էլ պատրաստվում է իրականացնել: Ըստ էության, նրա առաջարկի հիմքում երկու տարբերակ է ընկած՝ կամ ընդդիմությանն է հանձնվում ողջ գործադիր իշխանությունը, կամ իրենք պահպանում են ընդդիմադիրի կեցվածքն ու հաղթական մոտենում 2017-ի ընտրություններին: Բնականաբար, սա չէր կարող ընդունվել նախագահի կողմից, քանի որ ակնհայտ է, որ այս դեպքում նա հանձնում է իշխանությունը եւ հայտնվում անգլիական թագուհու դերում:

Այս չստացված հանդիպմանը հաջորդեց Ծառուկյանի հանդիպումը նախագահական վերջին երեք ընտրությունների փաստացի հաղթող թեկնածուների հետ՝ Տեր-Պետրոսյան-Դեմիրճյան եւ Րաֆֆի, ինչն առնվազն ուժի ցուցադրում էր: Սրանով ԲՀԿ-ն նաեւ ցույց տվեց, որ կարող է գնալ Տեր-Պետրոսյանի նախանշած սցենարով՝ դուրս գալ փողոց եւ անցնել Սերժ Սարգսյանի հրաժարականը պահանջելուն: Մեր աղբյուրների համաձայն՝ նրանք հակված են առաջին հերթին «շուրջօրյա հանրահավաքների» միջոցով վիժեցնել նոր կառավարության ծրագրի ընդունումը՝ «ստիպելով Սարգսյանին, Սահմանադրության համաձայն, ցրել խորհրդարանը եւ Ազգային ժողովի արտահերթ ընտրություններ անցկացնել»։ Այսպիսով, կարելի է արձանագրել, որ ապրիլի 11-ի դրությամբ «Սերժիկ, հեռացիր» տարբերակը թե՛ ՀԱԿ, թե՛ ԲՀԿ կուսակցությունների օրակարգից դուրս է եկել:

Թերթի աղբյուրը վկայում է, որ նրանց միջեւ համաձայնություն կա նաեւ սահմանադրական բարեփոխումները եւս 4 տարով հետաձգելու եւ դրանց միայն 2018 թվականի նախագահական ընտրություններից հետո անդրադառնալու հարցում: Այսպիսով, կարելի է արձանագրել, որ երկրում փաստացի երկիշխանություն է հաստատվել, եւ քաղաքական օրակարգը թելադրում է ոչ թե քաղաքական մեծամասնությունը, այլ ոչ իշխանական քառյակը:

Իսկ այսօր Ծաղկաձորում համատեղ հավաքի ժամանակ ոչ իշխանական ուժերը կփորձեն նաեւ երկրի տնտեսական օրակարգ ձեւավորել: Մյուս կողմից դժվար չէ նկատել, որ երկու կողմերը՝ իշխանական եւ ոչ իշխանական, այս պահին միմյանց համար ցուցադրական զորավարժություններ են կազմակերպում, խաղում են միմյանց նյարդերի վրա: Տեսնենք, թե ում նյարդերն առաջինը տեղի կտան:

Շարունակությունը' «Հրապարակ» օրաթերթի այսօրվա համարում: