«Հրապարակ». Ինչու են հայ պատվիրակները ԵԽԽՎ-ում դեմ քվեարկել

Ինչպես հայտնի է, այս օրերին ԵԽԽՎ հերթական նիստում դրված էր Ռուսաստանի դեմ սանկցիաներ կիրառելու հարցը, որին հայաստանյան պատվիրակության բոլոր չորս անդամներն էլ դեմ են քվեարկել։ Թե ինչու են հայ պատվիրակներն այդպես վարվել, զրուցեցինք ԵԽԽՎ հայաստանյան պատվիրակության ղեկավար Դավիթ Հարությունյանի հետ, ով ասաց, որ դա պայմանավորված է եղել նրանով, որ իրենց կարծիքով՝ այդ մոտեցումը իրականում չի լուծում այն խնդիրները եւ մարտահրավերները, որոնք ներկա պահին առկա են: Գրում է «Հրապարակ»-ը:

«Մեր կարծիքով՝ ԵԽԽՎ-ն ընդամենը արձագանքում է իրողություններին: Մենք Ուկրաինայում հետագա էսկալացիայի լուրջ վտանգ ենք տեսնում, եւ վեհաժողովը պետք է քայլեր ձեռնարկի այդ էսկալացիան կանխելու համար, սակայն միակողմանի քաղաքական հայտարարությունները, մեր կարծիքով, որեւէ արդյունքի չեն բերում»,- ասաց Դավիթ Հարությունյանը: Նա նաեւ նշեց, որ այս կապակցությամբ իրենց մտահոգություններն իրականություն դարձան, քանի որ ռուսական պատվիրակությունը կասեցրեց իր անդամությունը վեհաժողովի աշխատանքներին, ինչը նշանակում է երկխոսության բացակայություն: Նրա խոսքով՝ գործադիր իշխանության պարագայում կարելի է հասկանալ որոշակի սանկցիաների կիրառումը, սակայն անհասկանալի են այն սանկցիաները, որոնք կիրառվում են խորհրդարանական հարթակներում: «Խորհրդարանն այն հարթակն է, որտեղ պետք է կայանա երկխոսություն, եւ ինչքան էլ մեր կարծիքները տարբերվեն միմյանցից, այստեղ մենք պետք է կարողանանք պատշաճ աշխատանք տանել՝ փորձելով հարցերը քննարկել, դուռ չփակել քննարկումների համար: Ահա սա է մեր մոտեցումը»,- ասաց նա:

Քննարկումների արդյունքում Ռուսաստանի դեմ սանկցիաները մի փոքր մեղմացվել են, արդյունքում՝ ՌԴ-ն ոչ թե անորոշ ժամկետով, այլ մինչեւ տարվա վերջ է զրկվել ձայնի իրավունքից, ինչպես նաեւ զրկվել է ԵԽԽՎ կազմում պաշտոններ ստանձնելու իրավունքից։

Անդրադառնալով Քեսաբի խնդրով մեր պատվիրակներից երեքի ներկայացրած զեկույցներին, եւ մեր հարցին, թե ԵԽԽՎ-ն ի՞նչ վերաբերմունք է դրսեւորել այդ զեկույցների ու, առհասարակ, քեսաբահայերի տեղահանության փաստի վերաբերյալ, Դավիթ Հարությունյանն ասաց, որ Քեսաբի հարցով վեհաժողովից որեւէ կոնկրետ գործողություն չի ակնկալում, քանի որ ԵԽԽՎ-ն քաղաքական մարմին է եւ ընդունում է միայն քաղաքական հայտարարություններ: «Ես կարծում եմ, որ քաղաքական մարմնից անմիջական գործողություն չի կարելի ակնկալել, որովհետեւ Եվրախորհրդի խորհրդարանական վեհաժողովը պարտադիր բանաձեւեր անգամ չի կարող ընդունել»,- ասաց նա եւ ավելացրեց, որ Քեսաբի հարցը վեհաժողովում բարձրացնելու համար իրենք ընտրեցին հայտարարությամբ հանդես գալու ճանապարհը։ Իսկ այն պատգամավորները, ովքեր ստորագրել են հայտարարության տակ, արտահայտել են իրենց քաղաքական դիրքորոշումը Քեսաբի դեպքերի վերաբերյալ:

Շարունակությունը' «Հրապարակ» օրաթերթի այսօրվա համարում: