«Հրապարակ». Սերժ Սարգսյանի հայտարարությունը տարակուսանքի տեղիք է տվել

Նախօրեին Սահմանադրական բարեփոխումների հայեցակարգի հրապարակումից հետո Սերժ Սարգսյանի արած հայտարարությունը տարակուսանքի տեղիք է տվել: Մեկնաբանությունները տարբեր են՝ սկսած «կեցցե» բղավելուց, վերջացրած «կխաբի» եզրահանգումներով: Գրում է «Հրապարակ»-ը:

Թվում է՝ դրանից լավ բա՞ն. մարդն իր բերանով հայտարարում է, որ չի պատրաստվում առաջադրվել, եւ եթե երկիրն անցնի վարչապետական կառավարման, չի պատրաստվում զբաղեցնել վարչապետի, այսինքն՝ երկրի փաստացի ղեկավարի պաշտոնը:

Ավելին՝ անգամ հայտարարում է, թե իր կարծիքով՝ «մեկ մարդը երկու անգամից ավել իր կյանքում չպետք է հավակնի երկրի կառավարման ղեկին Հայաստանում»: Դա ոչ միայն հակադեմոկրատական է, այլեւ երկրի զարգացման ու իմիջի համար վնասակար: Բայց կարծես այնքան էլ մեծ չէ հրճվողների բանակը: Մի տեսակ հավատ չի մնացել պետական պաշտոնյաների, առավել եւս նախագահների խոսքի նկատմամբ եւ կամովին իշխանությունից հրաժարվելու փաստեր էլ առանձնապես շատ չունենք: Բայց տողատակերում կարդալու գործում առավել հմտացածները ուրիշ բան էլ են նկատել: Մասնավորապես այն, որ գործող նախագահը դեմ չէ վարչապետ լինել՝ եթե պահպանվում է կիսանախագահական կառավարման համակարգը եւ իր համար ընդունելի նախագահ է ընտրվում:

Իսկ եթե փորձենք «բացել» Հանրապետական կուսակցության հասցեին ասված դիֆերամբները եւ հասկանալ, թե ինչ է թաքնված «ինչպիսի սահմանադրական կառուցակարգերի վրա էլ կանգ առնեք, Հայաստանի Հանրապետական կուսակցությունը կշարունակի իր ծանրակշիռ ու որոշիչ դերակատարությունը Հայաստանում» արտահայտության ետեւում, ապա պետք է արձանագրենք, որ ԱԺ-ում մեծամասնություն ունենալու եւ առնվազն ԱԺ նախագահի պաշտոնը զբաղեցնելու հայտ է սա: Չի բացառվում նաեւ, որ պարզապես մենք բոլորս չափից դուրս կասկածամիտ ենք դարձել:

Շարունակությունը' «Հրապարակ» օրաթերթի այսօրվա համարում: