«Տնտեսությունը ընդդիմադիր չի կարող լինել». Գագիկ Ծառուկյան (տեսանյութ)

ԲՀԿ նախագահ Գագիկ Ծառուկյանի նախաձեռնությամբ Ծաղկաձորում մեկնարկեց ԱԺ ոչ իշխանական չորս ուժերի տնտեսական համաժողովը: Համաժողովին մասնակցեցին մի շարք երկրների հեղինակավոր տնտեսագետներ ու քաղաքական գործիչներ, այդ թվում հյուրեր Չեխիայից, Սլովակիայից և Լատվիայից: Մինչև աշխատանքային քննարկմանն անցնելը ելույթներով հանդես եկան ԲՀԿ առաջնորդ Գագիկ Ծառուկյանը, ՀԱԿ, «Ժառանգություն», ՀՅԴ կուսակցությունների ներկայացուցիչները:

Ողջունելով համաժողովի մասնակիցներին՝ ԲՀԿ նախագահը նշեց, որ տեղյակ է, որ մինչ այս աշխատել է ԱԺ ոչ իշխանական չորս ուժերի տնտեսագետներից ու փորձագետներից կազմված աշխատանքային խումբ, որի կողմից պատրաստվել է տնտեսության զարգացման ծրագրի նախագիծ և հիմնական մոտեցումներ: Գագիկ Ծառուկյանը ընդգծեց, որ պարզից էլ պարզ է, որ նույնիսկ ամենալավ ծրագրում հնարավոր չէ գտնել բոլոր լուծումներն ու դրանք միանգամից իրականություն դարձնել: Բայց ծրագիր կազմելը շատ կարևոր է՝ ուժերի մոտեցումները արձանագրելու, լուծումներ առաջարկելու, և, ինչու չէ, ցույց տալու այն հիմնական կոպիտ սխալները, որոնք թույլ է տվել կառավարությունը վերջին տարիներին: ԲՀԿ նախագահ Գագիկ Ծառուկյանի համոզմամբ Հայաստանի տնտեսությունը կարիք ունի կտրուկ բարելավման, և այս իմաստով արդեն իսկ նախանշված են տնտեսության զարգացմանն ուղղված հիմնական ուղղությունները:

Չորս ոչ իշխանական ուժերից յուրաքանչյուրը ծավալուն վերլուծություն ներկայացրեց մեր երկրի տնտեսական վիճակի, դրանից դուրս գալու ուղիների վերաբերյալ: ԱԺ ՀՅԴ խմբակցության անդամ Արծվիկ Մինասյանն իր ելույթում անդրադարձավ օրեցօր ահագնացող արտագաղթին, աղքատության ավելացմանը, գործազրկությանն ու հիասթափությանը: Նշվեց, որ սա այն ամենն է, ինչ վերջին տարիներին բաժին է թողել Հայաստանի կառավարությունը: Համաժողովի մասնակից քաղաքական չորս ուժերը փորձել են համախմբվել միասնական մոտեցումների հենքի վրա՝ կենտրոնում ունենալով ՀՀ քաղաքացուն, Հայաստանի Հանրապետությունը:

ԲՀԿ պատգամավոր Միքայել Մելքումյանն իր ելույթում նշեց, որ չնայած կառավարության հայտարարած նոր աշխատատեղերին դրանք այդպես էլ մնացին թղթի վրա: Փոքր ու միջին բիզնեսի աջակցության փոխարեն 3 հազարից ավելի խանութներ փակվեցին՝ 20 հազար մարդու թողնելով առանց աշխատանքի: Նշվեց, որ համաժողովում, ըստ էության, առաջ է քաշվում ապագա կառավարությանը ներկայացվող ծրագրի տնտեսական պլատֆորմը:

ՀԱԿ ներկայացուցիչ, տնտեսագետ Վահագն Խաչատրյանն իր ելույթում համոզմունք հայտնեց, որ Հայաստանը հայտնվել է խորը ճգնաժամի մեջ, ինչի լուծումն այլևս ոչ թե դեղամիջոցներն են, այլ վիրահատական միջամտությունը:

Համակարգային փոփոխությունների դիրքերից հանդես եկավ նաև «Ժառանգություն» խմբակցության ղեկավար Ռուբիկ Հակոբյանը:

Արտերկրից հրավիրված մասնագետները նշեցին, որ պատրաստակամ են աջակցել մեր երկրի առջև ծառացած մարտահրավերների լուծմանը՝ ներկայացնելով նաև իրենց երկրների փորձը: Ելույթներով հանդես եկան Լատվիայի էկոնոմիկայի նախկին նախարար Այգարս Շտոկենբերգսը, Սլովակիայի Հանրապետության պատգամավոր Մարոս Կոնդրոտը, ով կարևորեց կոռուպցիայի դեմ պայքարը, տնտեսական բարեփոխումների անհրաժեշտությունը, փոքր ու միջին բիզնեսի իրական խթանումը:

Բրատիսլավայի տնտեսագիտական համալսարանի միջազգային բիզնեսի ամբիոնի վարիչ Պիտեր Բալաշն իր խոսքում նշեց, որ անհրաժեշտ է ստեղծել նոր ռազմավարություն՝ օգտագործելով երկրի տնտեսական հնարավորությունները, արտերկրի հայերի ներուժը, ուղղակի ներդրումները. այդ ներդրումների համար պետք է նոր պայմաններ ստեղծել: Ընդգծվեց պետության քաղաքական կամքի կարևորությունը՝ արմատական փոփոխություններ իրականացնելու հարցում:

Չեխիայի ՆԳ նախկին նախարար Կիրիլ Սվոբոդան նշեց, որ տպավորված է հանդիպումներով ու այն լավատեսությամբ, որով քաղաքական ուժերը լծվել են տնտեսական պլատֆորմի ստեղծմանը:

«Յուրաքանչյուրիս սրտացավությունից ու պատրաստակամությունից է կախված մեր երկրի ապագան: Առանց ուժերի համախմբման ու միասնական նպատակի հնարավոր չէ կառուցել բարգավաճ ու հզոր երկիր»,- ամփոփելով աշխատանքները' նշեց Գագիկ Ծառուկյանը' համոզմունք հայտնելով, որ համաժողովի ընթացքում ներկայացված առաջարկներն ու լուծումները մեծապես նպաստելու են մեր երկրի տնտեսության առկա խնդիրների լուծմանն ու ստեղծված ճգնաժամային իրավիճակի հաղթահարմանը: