«ԱՐՏ-ՖԵՍՏ»-ի հանդեպ ոգևորությունը մեծացել է

Այս տարվա մայիս ամսին կմեկնարկի «ԱՐՏ-ՖԵՍՏ» երկրորդ երիտասարդական հանրապետական բաց փառատոնը' «Մեկ տանիքի ներքո» խորագրով:

Հայաստանում արդեն երկրորդ անգամ է կազմակերպվում նման մասշտաբային մշակութային միջոցառում: Այն իր մեջ ներառելու է արվեստի մի քանի տեսակ՝ թատերական արվեստ, կինոարվեստ, կերպարվեստ (գեղանկարչություն, քանդակագործություն, գրաֆիկա, լուսանկարչություն):

Իր տեսակետն է հայտնել նաև փառատոնի պրոդյուսեր Նարեկ Արշակյանը.

«Նախ և առաջ, խորին շնորհակալություն ենք հայտնում ՀՀ մշակույթի նախարարությանն ու Երևանի քաղաքապետարանին՝ «ԱՐՏ-ՖԵՍՏ» երիտասարդական հանրապետական երկրորդ բաց փառատոնին աջակցելու համար: Փառատոնն իր առջև խնդիր է դրել երիտասարդական ստեղծագործական խմբերին և անհատ ստեղծագործողներին համախմբել մեկ գաղափարի շուրջ, այն է՝ արվեստի տեսակները մեկ տանիքի ներքո, ինչն էլ դարձավ այս մշակութային միջոցառման խորագիրը: Մենք ինքներս՝ լինելով երիտասարդ, մեծ պատասխանատվությամբ ենք վերաբերում այս փառատոնին՝ հասկանալով նրա կարևորությունը: Երիտասարդներին հնարավորություն ընձեռելով հանդես գալ իրենց ստեղծագործություններով՝ փառատոնը հարթակ կդառնա երիտասարդների համար մշակութային փորձի փոխանակման առումով, նոր կապեր կստեղծի տարբեր ոլորտներում հանդես եկող երիտասարդ գործիչների համար, հնարավորություն կընձեռի շփվել արվեստի վաստակավոր գործիչների հետ, ինչն, անխոս, կնպաստի նրանց մշակութային ներուժի զարգացմանը:

Փառատոնը հրաշալի հնարավորություն է տալիս ուսումնասիրել այսօրվա մշակութային դաշտի ծավալուն հատվածը: Վստահ եմ, որ այս փառատոնն իր կարևորագույն առաքելությունն ունի հայ հանդիսատեսի և առհասարակ հայ հասարակությանը արվեստի տարբեր տեսակներին մասնակից դարձնելով:

Ելնելով «ԱՐՏ-ՖԵՍՏ» երիտասարդական հանրապետական առաջին բաց փառատոնի հանդեպ առաջացած հասարակական մեծ արձագանքից, այս տարի սպասվում է էլ ավելի մեծ ոգևորություն հայ արվեստասեր հասարակության կողմից:

Վստահ եմ, որ փառատոնի կողքին կկանգնեն նաև մասնավոր աջակիցներ, առանց որոնց այսօր շատ դժվար է մշակութային միջոցառումների կազմակերպումը:

Վերջում փառատոնին մաղթենք անամպ երկինք, քանի որ փառատոնի մի մասն անց է կացվելու բաց երկնքի տակ, իսկ մասնակիցներին համբերություն, մինչ փառատոնի մեկնարկը»: