Քաղաքագետն ԱՄՆ սենատի հանձնաժողովի` Հայոց ցեղասպանության դատապարտող բանաձևի ընդունումը դրական տեղաշարժ է համարում

ԱՄՆ սենատի արտաքին հարաբերությունների հանձնաժողովի՝ Հայոց ցեղասպանության փաստը դատապարտող բանաձևը կարելի է դրական տեղաշարժ համարել: Այս մասին ապրիլի 14-ին լրագրողների հետ հանդիպմանն ասաց քաղաքագետ Արամ Մանուկյանը: «Իհարկե, ընդհանուր ճանաչման գործընթացում սա շատ փոքր բան է, սակայն ողջունելի է, որ Սենատն ընդունել է Հայոց ցեղասպանության փաստը դատապարտող այս բանաձևը»,-նշեց Մանուկյանը:

Մանուկյանն ընդգծեց, որ ապագայում էլ ԱՄՆ կողմից Հայոց ցեղասպանության ճանաչմանն ուղղված քայլեր կարվեն, սակայն դրանք կարվեն այնպես, որպեսզի չխաթարվեն հարաբերությունները Թուրքիայի հետ: Նրա խոսքով` ԱՄՆ-ն Հայոց ցեղասպանությունը վերջնականապես կճանաչի միայն այն ժամանակ, երբ դա կհամապատասխանի իր շահերին, իսկ այս այդ երկրի համար առայժմ բոլորովին շահավետ չէ Հայոց ցեղասպանության ճանաչումը:

Քաղաքագետի խոսքով` ԱՄՆ-ի համար այս պահին Թուրքիան շատ կարևոր գործընկեր է, ուստի այդ երկիրը չի գնա քայլերի, որոնք կարող են վատթարացնել հարաբերությունները Թուրքիայի հետ: «Այս պահին Մերձավոր Արևելքում և, մասնավորապես, Սիրիայում ընթացող գործընթացներում Թուրքիան կարևոր գործընկեր է ԱՄՆ-ի համար: Գաղտնիք չէ, որ վերջին շրջանում վատթարացել են ԱՄՆ-ի և Ռուսաստանի հարաբերությունները, ուստի այս տեսանկյունից էլ ԱՄՆ-ի համար ձեռնտու չէ Թուրքիայի նման դաշնակցի կորուստը»,- ասաց Մանուկյանը: