2013 թվականին աշխարհում սպառազինության ծախսերը կազմել են 1,75 տրիլիոն դոլար. ՍԻՊՌԻ

2013 թվականին աշխարհում սպառազինության ծախսերը կազմել են 1,75 տրիլիոն դոլար, ինչը 1,9 տոկոսով քիչ է 2012 թվականի համեմատությամբ: Այս մասին վկայում են Ստոկհոլմի խաղաղության հիմնախնդիրների հետազոտությունների միջազգային ինստիտուտի (ՍԻՊՌԻ) զեկույցի տվյալները, որտեղ փորձագետները նշում են Արևմուտքում ռազմական ծախսերի շարունակվող կրճատումը՝ աշխարհի մյուս բոլոր տարածաշրջաններում դրա նց միաժամանակյա ավելացմամբ հանդերձ:

Ըստ մասնագետների տվյալների՝ աճի տարածաշրջաններում, բացառությամբ ԱՄՆ-ի, ռազմական ծախսերն ավելացել են 1,8 տոկոսով: Ռազմական բյուջեների էական աճ է նկատվել Չինաստանում, Ռուսաստանում և Սաուդյան Արաբիայում: Վերջինս արդեն գործնականում առաջ է անցնում Մեծ Բրիտանիայից, Ճապոնիայից և Ֆրանսիայից և պատրաստվում է աշխարհում չորրորդ հորիզոնականը զբաղեցնել ռազմական կարիքների համար ամենախոշոր ծախսերն անող պետությունների թվում, պնդում են ՍԻՊՌԻ-ի փորձագետները: Ըստ նրանց տվյալների՝ Չինաստանը, Ռուսաստանը և Սաուդյան Արաբիան մտնում են նաև այն 23 երկրների թիվը, որոնք 2004 թվականից ի վեր ավելի քան կրկնապատկել են սպառազինությունների ծախսերը:

2013 թվականին ԱՄՆ-ում բյուջեի այս հոդվածը կրճատվել է 7,8 տոկոսով՝ որպես Իրաքում պատերազմի ավարտի, Աֆղանստանից զորքերի դուրսբերումն սկսելու և բյուջետային միջոցների ավտոմատ կրճատման արդյունք, որը Կոնգրեսն ընդունել է 2011 թվականին: Ըստ որում Արևմտյան և Արևելյան Եվրոպայի երկրներում և մյուս արևմտյան պետություններում խնայողության ռեժիմը մնացել է որոշիչ միտում, ասված է զեկույցում:

Մինչդեռ, ՍԻՊՌԻ-ի ռազմական ծախսերի ծրագրերի բաժնի տնօրեն դոկտոր Սեմ Պեռլո Ֆրիմանը նշել է, որ զարգացող երկրներում ռազմական հատկացումների աճը չի դադարում:

Մերձավոր Արևելքում ռազմական ծախսերի բնագավառում առաջատարներն են Սաուդյան Արաբիան և Իրաքը: 2013 թվականին տարածաշրջանում սպառազինության վրա ծախսվել են 4 տոկոսով ավելի միջոցներ, այդ ծախսերի ընդհանուր գումարը կազմել է 150 միլիարդ դոլար:

Սաուդյան Արաբիան իր ռազմական բյուջեն ավելացրել է 14 տոկոսով (67 միլիարդ դոլար), այդ թվում Իրանի հետ հարաբերությունների սրման պատճառով: Տարածաշրջանում ռազմական ծախսերի ամենամեծ ավելացումը տեղի է ունեցել Իրաքում (27 տոկոս), որտեղ շարունակվում է բանակի վերակառուցումը:

Ըստ ՍԻՊՌԻ-ի տվյալների՝ 2013 թվականին Աֆրիկայում ռազմական ծախսերն աճել են 8,3 տոկոսով՝ ամբողջությամբ վերցված հասնելով 44,9 միլիարդ դոլարի: Ալժիրը դարձել է Աֆրիկայի առաջին երկիրը, որն անցել է 10 միլիարդ դոլարի շեմը:

Ասիայում և Օվկիանայում 2013 թվականին ռազմական ծախսերի աճը կազմել է 3,6 տոկոս: Ռազմական կարիքների համար ծախսված ընդհանուր գումարը հասել է 407 միլիարդ դոլարի: Բյուջեի այս մասի առավել մեծ ավելացումը նկատվել է Չինաստանում՝ գրեթե 7,4 տոկոս, որի միագումար ծախսերը գնահատվում են 188 միլիարդ դոլար, հաղորդել է ԻՏԱՌ-ՏԱՍՍ գործակալությունը: